Los arqueólogos van volver esti branu a Les Regueres pa siguir desentrellizando'l pasáu romanu del centru d'Asturies. El xacimientu de La Estaca va sometese a una nueva campaña, dirixida por Juan Muñiz y que va empezar el próximu 8 d'agostu. Lo calculao ye que los trabayos duren un mes. Los dos sondeos van centrase en dos zones mui concretes: una estancia de la villa, amiesta a una zona na qu'en campañes anteriores desaterráronse numberosos restos, y una calzada detectada en 2013 y na qu'agora se va facer un estudiu específicu.
En relación al sondéu de la calzada, Muñiz esclaria que se trata de sacar a la lluz la estructura pa ver de datala y, a ser posible, confirmar la so estensión y orientación, pa ver escontra ónde empobinaba. En cuanto al segundu sondéu, va centrase nuna estancia nel sector sur de la casa, no que supon una estensión lóxica de los trabayos de 2021. La cantidá de materiales, principalmente cerámicos, recuperaos nes dependencies d'esa zona de la villa resulta bien relevante pa los arqueólogos, una y bones estes pieces permiten acutar cronolóxicamente les etapes d'ocupación de los xacimientos.
Como nes campañes anteriores, esta nueva actuación nel xacimientu de La Estaca ta financiada pola Asociación Amigos de la Villa de San Martín de La Estaca, que caltienen abiertes les sos cuentes pa recibir donaciones d'aquellos mecenes interesaos en contribuyir económicamente pa garantizar la continuidá de les escavaciones. Amás, y como foi norma nel restu de campañes, los interesaos tamién van poder visitar el xacimientu nel tramu final de los trabayos d'esti branu.
Edificáu, polo que se sabe, alredor del sieglu III depués de Cristu, el complexu de La Estaca garró fama en 2018, cuando l'equipu lideráu por Juan Muñiz desenterró un espectacular mosaicu, el segundu qu'apaecía na zona, por que en 1958 apaeciera otru, que se caltien anguaño nel Muséu Arqueolóxicu.
El sofitu vecinal permitió a los arqueólogos siguir coles escavaciones nestos años, faciendo campaña tres campaña afayos qu'apunten a que La Estaca yera la residencia d'una familia poderosa na dómina. El so allugamientu, próximu a un nuedu de comunicaciones, y la naturaleza de los restos yá recuperaos apunten a esa conclusión.
El mosaicu descubiertu por Muñiz en 2018 vio afitada va unos meses, en concretu en marzu d'esti añu, la so relevancia por un afayu inesperáu: l'apaición al facer unes obres en Londres d'otru mosaicu asemeyáu al asturianu, fecháu ente los sieglos II ya III de la nuesa era. "Son dos mosaicos bien asemeyaos. Probablemente sían resclavos d'una moda, que s'impondría en Roma y 50 o 60 años dempués llegara a les zones perifériques del Imperiu, como yera la Península Ibérica. Eso esplicaría la semeyanza ente dambos mosaicos", esplicaba, tres l'afayu, Juan Muñiz. Trátase, sía que non, d'un niciu más de la relevancia del xacimientu de Les Regueres.
