Valdés vuelve amosar el misteriosu mundu del kraken. El Muséu del Calamar Xigante de L.luarca reabrió esti día n'otru allugamientu, na cai Nicanor del Campo, dempués d'ocho llargos años ensin l'equipamientu por mor del temporal marítimu de febreru de 2014, que llevó per delantre les antigües instalaciones, allugaes nel puertu. Casi una década depués, la villa l.luarquesa recupera ún de los sos principales atractivos turísticos, únicu nel mundu, con una esposición que cunta colos seis calamares xigantes y 35 cefalópodos que se salvaron de la galerna, mesmo que pexes de fondura y muestres de güesos de los depredadores de la especie, los cetáceos. Toos ellos apurríos pola Coordinadora pal Estudiu de les Especies Marines (Cepesma) y guardaos pol Conceyu.

En L.luarca foi un día de celebración porque l'apertura del Muséu, "en combinación con otros que yá tenemos como'l Xardín de la Fonte Baxa y el Parque de la Vida, creo que-y da esa capacidá de competir con una ufierta turística mui amplia y bien singular. Esti tipu de recursos apúrren-y un valor añedíu perimportante", destacó l'alcalde de Valdés, Óscar Pérez. Trátase, na so opinión, d'una esposición de divulgación científica que xenera "oportunidaes pal texíu económico". Por ello, anima al públicu científicu, al escolar y familiar a allegar a la villa marinera p'afayar los secretos del fondu marín.

Hugo Pérez, nun panel interactivu, xunto al so güelu, Leopoldo Pérez. | S. Arias

El visitante va poder conocer la vida de los calamares xigantes al traviés d'un percorríu circular, con lluces seles y el soníu de l'agua de fondu, pa conocer les especies de cefalópodos, ente los que s'inclúin pulpos y xibies. Tamién hai un llaboratoriu sobre l'anatomía d'estos seres, información sobre la so alimentación y crecedera, una zona dedicada a la curiosa reproducción del calamar y documentación sobre los sos depredadores. Coles mesmes la colección da a conocer la parte más mitolóxica de la especie y tien un área de conciencia ambiental onde amuesen cómo curiar los océanos. Tou ello, de manera interactiva con distintes pantalles. 

Les nueves instalaciones del Muséu del Calamar Xigante de L.luarca supunxeron una inversión de 300.000 euros, cofinanciada pol Consistoriu y la Conseyería de Cultura, con aportaciones de 220.000 euros y 80.000 euros, respectivamente. A conocer les instalaciones allegó la conseyera del área, Berta Piñán, que celebró l'apertura: "Güei ye un día feliz porque son ocho años de batalla, pero esta Corporación teníalo bien claro dende'l principiu, quería recuperar esti emblema pa L.luarca, que ye un emblema cultural pero tamién tractor turísticu", sorrayó. Tamién asistieron el presidente de la Xunta Xeneral del Principáu, Marcelino Marcos Líndez, la vicepresidenta primera del Parlamentu asturianu, Celia Fernández, y la diputada Lidia Fernández. Piñán punxo énfasis en cómo estos equipamientos culturales "desestacionalicen" el turismu "y nesti casu ye divulgativu y d'esperiencies". 

Toño Venteiro empobina al so amigu invidente Raúl Fernández pela muestra. | S. Arias

Na xornada inaugural de la colección del kraken, asistió yá numberosu públicu. Munchos apasionaos de la especie, como'l pequeñu l.luarqués Hugo Pérez Álvarez, mui emocionáu cola muestra. "Ye mui guay", comentó. Tamién allegó Raúl Fernández Arrizabalaga, siguidor del Cepesma. Nel so casu, al ser invidente, conoció'l muséu al traviés de les manes y el soníu, anque echó en falta unes audioguíes. "Ta perbién, anque faime falta una persona que me describa delles coses", apuntó. 

A la cita nun faltó'l presidente del Cepesma, Luis Laria, que quixo rescamplar l'esfuerzu del Conceyu "pero non el del Principáu, que fixo de menos dafechu la esposición a lo llargo d'ocho años. Tendría que tener buscao una alternativa. Nun tuvo al altor de les necesidaes de la zona y del occidente asturianu", criticó.