La Fundación Princesa d'Asturies dio la salida a la carrera pol "Pueblu exemplar" más abierta de los postreros cuatro años. O la que va tener más aspirantes na llinia de salida. El plazu pa la presentación de candidatures acabó esti día con 29, más qu'en toles últimes ediciones dende la de 2018, a la qu'optaron 32 y una llista de postulantes que se refixo con seis que nun taben na relación del añu pasáu y qu'amplía la carrera a representantes de 23 conceyos. Vistos nel mapa, los contendientes configuren una singular "vuelta a Asturies" d'oriente a occidente, o viceversa.
Los aspirantes a exemplares que nun optaron en 2021 y sí se decidieron a dar el pasu son la comunidá vecinal de Villanueva, en Santo Adriano, Pimiango (Ribadeva), Coya (Piloña), Cué (Llanes), la sociedá La Montera de Llangréu y el Mercáu Artesanu y Ecolóxicu de Xixón. Ellos y los 23 "veteranos" del concursu van cruciar los deos d'equí al próximu día 2 de setiembre, el día nel que'l xuráu va anunciar el sucesor de Santa María del Puertu (Somiedo), ganadora en 2021.
Citaos d'occidente a oriente, los 23 aspirantes que yá compitieron va un añu son Pezós, la biblioteca de Cuaña, Cadavéu (Valdés), les "xentes de la villa de Salas", Banduxu (Proaza), Fitoria (Uviéu), la comunidá vecinal de San Cucufate (Llanera), Llaviana (Gozón), Valdesoto (Siero), l'asociación de vecinos San Jorge de Santurio (Xixón), el valle del Samuño y Trapa, La Vega y el Carme (Llangréu), Pel.luno (Ayer), Villoria (Llaviana), la comunidá vecinal casina, Arroes (Villaviciosa), l'asociación vecinal Ríu Fontoria (Piloña), la contorna del ríu Sella, Ribeseya, Coviella (Cangues d'Onís), Posada y la cofradía de pescadores Santa Ana (Llanes) y Suarías (Peñamellera Baxa).
Tán en xuegu 25.000 euros y una visita de la Familia Real n'ochobre, al otru día de la entrega de los premios Princesa d'Asturies. Los miembros del xuráu tendrán de decidir cuál d'estos pueblos s'afaya meyor a lo que piden les bases d'una recompensa destinada a galardonar "al pueblu, aldea, núcleu de población, espaciu paisaxísticu o grupu humanu del Principáu d'Asturies que destacara de manera bultable na defensa y caltenimientu de la so redolada natural y ambiental, del so patrimoniu históricu, cultural o artísticu, n'iniciatives d'impulsu económicu y social o na realización d'obres comunales o otres manifestaciones de solidaridá sobresalientes".
