"Al cultivu del arándanu fai-y falta una reconversión n'Asturies sí o sí", diz Juan Carlos García Rubio, técnicu del Serviciu Rexonal d'Investigación y Desenvolvimientu Agroalimentariu (Serida), qu'esplica que nes xornaes del arándanu y los frutos coloraos d'Asturies, que se van a celebrar en Villaviciosa ente los díes 29 y 31 d'esti mes de xunetu, va tratar sobre la posibilidá d'introducir na rexón una variante distinta a la qu'aportó en 2005 y que tien como principales característiques que se cultiva en tiestos de gran tamañu, que crez muncho más rápido y que, al riquir de bastante calor, precisaría la instalación d'invernaderos cenciellos pa desarrollase con ésitu nel Principáu.
García Rubio asegura que la variante que s'empezó a llantar n'Asturies en 2005 "nun tien bona entrada nel mercáu". Poro, el cultivu d'esti frutu coloráu necesita un xiru y buscar "variedaes que puedan ser bones p'Asturies". Una d'elles ye esta que se llanta "en tiestos grandes y que s'afaya perbién", sigue'l técnicu del Serida. El problema que tien ye que "fai-y falta calor" y, poro, "n'Asturies tendría que llantase baxo plásticu", añede García Rubio, pa quien se trata de daqué relativamente cenciello de facer: "Nun ye un gran problema, hai munchos llabradores que yá ponen plásticos, trátase d'invernaderos cenciellos, como los qu'hai en Huelva pa los frutos coloraos".
Los tiestos nos que se llantaría esti tipu d'arándanos seríen de 30 llitros de capacidá y otra de les ventayes que tien ye lo rápido que crez: "Prepárase un sustratu que fai que la planta creza bien rápido, nun añu llógrense los mesmos númberos que nel cuartu añu d'una planta de campu", esplica esti especialista n'arándanos. Otra de les ventayes ye qu'al tratase de tiestos pueden asitiase sobre cualquier tipu de suelu. Amás, la producción podría sacase nes feches más afayaíces pa tener bona acoyida nel mercáu: "Adelántrense a la producción de suelu y eso caería bien nel mercáu, saldría a finales de mayu, primero incluso; la producción de Huelva ye anterior y hasta xunu podría tenese un bon nichu de mercáu", esplica'l técnicu del Serida.
Ún de los inconvenientes d'esti nuevu cultivu d'arándanu del que se va falar na feria que se va a celebrar en Villaviciosa ye que pide una inversión inicial enforma mayor de la que se precisa para llantalos en suelu. "La inversión inicial ye alta, polos tiestos y el sustratu, suel ser un cultivu más intensivu, anque pa pequenes superficies ye más interesante que'l suelu pola rapidez cola que crez", señala Juan Carlos García Rubio, que cuantifica esa diferencia d'inversión: "La inversión ye'l doble qu'en suelu, pero tamién la puedes recuperar el doble de rápido".
El técnicu del Serida señala que la producción d'arándanos d'esti añu n'Asturies va ser asemeyada abondo a la de los años anteriores: "Hubo pocos plantíos nuevos y los qu'hubo compensaron con dalgún que s'abandono", diz. Ente les temes que se van a tratar na feria del arándanu y los frutos coloraos que se celebra en Villaviciosa, amás d'esti nuevu tipu de plantíu d'arándanu, va tar un nuevu tipu de plantíu denomináu "residuos cero", que taría ente l'agricultura convencional y la ecolóxica: "Puedes aplicar dellos yerbicíes y pesticides pero en dómines determinaes por qu'al recoyelo nun quede rastru".
