L'equipu d'investigación del Muséu Xurásicu d'Asturies (MUJA) sacó esti día dos buelgues de dinosauriu de los cantiles de Llastres (Colunga). Trátase d'una icnita d'un terópodu y otra d'un estegosauriu atopaes va unes selmanes nuna salida de campu. 

Según esplicó la investigadora del MUJA, Laura Piñuela, los dos son de gran tamañu y presenten frayadures. "Va costar sacales, pero esperamos que salgan bien. La d'estegosauriu ta bien caltenida abondo y hai otra tridáctila, bastante grandes les dos", dixo Piñuela. 

Tuvieron presentes l'alcaldesa de Colunga, Sandra Cuesta y el conseyeru de Cienca, Innovación y Universidá, Borja Sánchez. 

Na recuperación d'estes pieces participó l'equipu d'investigación del Muséu con José Carlos García Ramos y Laura Piñuela. 

La estracción realízase pa evitar que'l mar estroce les icnites coles galernes, daqué que se fai davezu pa calteneles. El terópodu ye un dinosauriu bípedu, carnívoru, de gran tamañu y l'estegosauriu un cuadrúpedu vexetarianu con plaques a lo llargo del llombu. L'afayu evidencia una vegada mas los innumberables restos xurásicos de la marina oriental. "Hai material enforma y tien la particularidá de que si nun lu saques la mar acaba por estrozalo", dixo la investigadora.