José María Navascués, o más concretamente'l so arte, va ser el gran protagonista de les xornaes de puertes abiertes de la Xunta Xeneral del Principáu, que se desenvuelven a partir del próximu xueves. El Muséu de Belles Artes d'Asturies, como fixo n'años anteriores, va complementar les xornaes con una esposición na mesma Xunta, que nesti casu va tar compuesta por una selección d'obres de Navascués procedentes de la colección de la gran pinacoteca rexonal. Concretamente, trátase de siete escultures y cinco dibuxos, obres dataes toes elles ente los años 1971 y 1979, nun períodu especialmente granible na trayectoria de Navascués, que finó precisamente en 1979.
La historiadora del arte Sara Moro García, comisaria de la esposición, optó por repartir les obres a lo llargo del itinerariu que van siguir los percorríos empobinaos de les xornaes de puertes abiertes, pa terminar nuna concentración de parte d'elles na sala Europa. «Navascués ye una de les figures más interesantes del arte de la segunda metá del sieglu XX y non solo a nivel d'Asturies, tamién nacional. Ye un creador singular, bien personal, tamién ambiguu en dellos sentíos, un escultor mui xenuinu que tamién pescudó con singular fortuna otros ámbitos como la pintura, el dibuxu, la fotografía o'l diseñu de muebles», sostien Sara Moro.
Lo afayaízo de Navascués como creador puede comprobase de primera mano na selección escoyida pa la muestra, qu'inclúi obres como les escultures «Guillotina», una pieza fechada en 1974; la espectacular «Piloto», de 1975; o Eros III, de 1971, toes elles realizaes en madera de pinu bálticu; y obres sobre papel como «Cascada», de 1976; o un perguapu «Paisaxe» que l'artista realizó nos sos últimos años.
Sara Moro tamién remarca la conexón perestrecha de la obra de Navascués col Muséu de Belles Artes d'Asturies, que-y dedicó una primer retrospectiva en 1984, apenes cinco años depués de la muerte del artista y cuando el muséu cumplía los sos cuatro, y que tien una pimpanuda colección d'obres del creador, nacíu en Madrid en 1934 pero que na so infancia marchó cola so familia a Xixón, onde se crió.
El director del Belles Artes, Alfonso Palacio, afonda nesta relación de la gran pinacoteca rexonal cola obra de Navascués recordando que l'artista tien una sala dedicada nel muséu (la -1 de l'Ampliación, na que se presenten les esposiciones temporales) y que nuna fecha tan recién como 2021 editóse'l catálogu razonáu «Navascués nel Muséu de Belles Artes d'Asturies», obra de María Soto Cano y coeditáu pol Belles Artes y l'Asociación d'Amigos del Muséu.
Palacio agradez amás la oportunidá de volver collaborar cola Xunta Xeneral del Principáu, na que va ser la cuarta collaboración del muséu cola institución, y revela qu'esta esposición ye la punta de llanza d'una voluntá del Belles Artes por esponer más de siguío n'otros llugares de la rexón. Una iniciativa que, avanza, quier acelerar énte la perspectiva de zarros «parciales, nunca completos» que pueda sufrir el muséu mientres les obres de la segunda fase de l'ampliación y que, siguiendo'l modelu de «El Prado extendido» van sirvir pa consolidar un proyectu de «Belles Artes espardíu». «Cedimos puntualmente obres a A Caridá, el Muséu Barjola, la Universidá o la Casa Natal de Xovellanos, pero la nuesa voluntá ye afondar nesti tipu de collaboraciones y sacar más de siguío los nuesos fondos a otros llugares, porque somos el Muséu de Belles Artes d'Asturies y les nueses colecciones tán al serviciu de tolos asturianos», sostien Palaciu.
