Una traxedia como la del desprendimientu de parte del glaciar na Marmolada, asocedida nos Dolomitas italianos esti mes y qu'arrampló cola vida d'once persones, ye imposible que pueda pasar n'Asturies. De mano, porque yá nun hai glaciares, esto ye, mases de xelu qu'avancen y presenten resquiebres de torsión, sinón neveros, que son mases de xelu estáticu. Per otru llau, yá tan cuntaos los neveros qu'hai nos Picos d'Europa, "cada vez más menguaos" pol calentamientu global, anque'l fechu de que tean munchos d'ellos soterraos ye un factor por que perduren. Pero la so disposición torga que puedan desprendese como pasó nos Alpes. Otra cosa, avisen, ye lo que pueda pasar nos Pirineos, onde sí hai glaciares. 

Según Jesús Ruiz Fernández, xeógrafu de la Universidá d'Uviéu y director del Cecodet, qu'estudió'l neveru de La Forcadona, "nun ye posible qu'haya esi tipu de desprendimientos, al tratase de campos de xelu de pequeñes dimensiones en sitios mui pequeños tamién, en circos que tán de la mesma en cuevarones". Los neveros de los Picos d'Europa tán "les más de les veces soterraos por argayos, colo que nun hai riesgu nengún". Según Ruiz, anque tán soterraos, como ye'l casu de La Forcadona, y esi ye un factor qu'aislla al xelu de la radiación solar, "ye bien posible que nunes décades terminen sumiendo". 

El xeógrafu de la Universidá de Cantabria Juan José González Trueba, de padre asturianu, fixo la so tesis sobre los neveros de los Picos d'Europa y conoz bien la so morfoloxía. "Daqué como lo de la Marmolada nun puede pasar nos Picos d'Europa. Los glaciares de los Dolomitas son más amplios, tán colgaos de les parés y pueden desprendese con más facilidá col aumentu de les temperatures", indica. Sicasí, los de los Picos "son más modestos de tamañu y tán fundiendo. Asitien amás al fondu de les parés, en fuexos o h.ous, na cara norte de los picos, y nun pueden soltase". Añede que "en los Picos hai restos de xelu fósil soterraos, y va llegar un momentu en que vaigan sumiendo". 

Un exemplu de lo que señala González Trueba ye'l H.ou Negru, el más importante de los neveros que se caltienen nos Picos d'Europa, con unes 2,2 hectárees de superficie y un espesor máximu d'unos 13 metros. El xelu d'esti h.ou forma una masa continuo ente los 2.315 y los 2.220 metros, na cara norte del Torrecerréu (2.650 metros) y ta cerráu nel frente por una morrena terminal de forma narquiada. 

Tamién hai otros neveros nel H.ou del Trasllambrión, a una altitú d'ente 2.350 y 2.450 metros, con una placa de xelu adosada a la paré de más de trés metros de grosor soterrada en gran parte por argayos de la fastera, data de la Pequeña Edá de Xelu (dende principios del sieglu XIV hasta mediaos del sieglu XIX). Otru neveru, el de La Palanca, asitia a 2.500 metros d'altor. 

Nel cantu sur del H.ou Santu, ente la Torre del Torco y la Torre Santa, atópase'l Neverón de La Forcadona, del qu'entá se caltien un cuerpu de xelu d'unos ocho metros d'espesor parcialmente soterráu so un mantu d'argayos. Otros neveros, como la Cemba Vieya (“neveru vieyu”) o la cara norte de Torre Santa, perdiéronse, el postreru quedó en dellos neveros permanentes de menguaes dimensiones. 

Polo que se refier a los Pirineos, el retrocesu de los glaciares nun fai albidrar un desprendimientu de xelu como'l de la Marmolada, anque la cayida de roques nel monte aceleróse col cambiu climáticu al alteriar el permafrost, que ye la capa de suelu xelada y qu'actúa como pegamentu. Un desprendimientu de roques asemeyáu al que tamién apocayá se produció nos Esparrets, nel valle de Pineta (Huesca), que motivó'l zarru d'un senderu a la Faja Tormosa. Nos glaciares más significativos, Monte Perdido o l'Aneto, nun hai seracs, bloques de xelu como'l que se desprendió en La Marmolada. Amás, les mases de xelu nun tienen tanta pendiente. Sicasí, nel Monte Perdido, en 1953, sí hubo un desprendimientu que mató a dos militares, anque nesi momentu había muncho más xelu qu'anguaño. 

Enrique Serrano, catedráticu de Xeografía Física de la Universidá de Valladolid que ta somorguiáu nuna campaña d'investigación en Groenlandia, coincide colos otros espertos: "Nos Picos nun ye posible esti procesu porque los neveros son mui pequeños, y si esgaña una porción afecta a una masa mui pequeña de xelu. Y poques gracies nun hai rutes montañeres per ellos". Anque matiza: "Sí ye posible nos Pirineos, na Maladeta llevamos 12 años estudiando'l frente y los colapsos son frecuentes. Yá hubo un GLOF (inundación pol apine violentu de llagu glaciar) con bastante peligrosidá. Pero, otra vuelta, eses rutes nun son tan frecuentaes como la Marmolada. Nel d'Aneto, sicasí, sí podríen asoceder coses asemeyaes y ye'l más frecuentáu".