La guerra aérea d'Uviéu contra l'aviéspora velutina va ser más curtia, pero más intensa. El Serviciu d'Estinción de Quemes y Salvamentu (SEIS) acaba de contratar un serviciu especial de control de la especie invasora con drones y carabines que yá se desenvolvió l'añu pasáu a lo llargo de cuatro meses como esperiencia piloto, pero nesti exerciciu va dir namás dende agostu hasta ochobre por mor del encarecimientu del venenu y otros materiales que fai imposible desenvolver un plan más llargu. 

El Conceyu recurrió a un contratu menor pa llograr los servicios de Pablo Valdeolmillos, un vecín de Llatores afincáu en Cualloto que xunto cola so esposa Marta González lleven tiempu ufiertando servicios de control de la población de velutina valiéndose d'un dron valoráu en 30.000 euros y carabines que permiten envenenar y desarraigonar los niales asitiaos en zones altes o de mal accesu. 

En 2021 el contratu empezó a dar los sos frutos en menos d'un mes. Valdeolmillos y González retiraron solo en xunetu d'esi añu más niales que los que los bomberos pudieren retirar nos seis meses anteriores. A pesar d'ello, la contrata tuvo un intensu trabayu tamién nos meses d'agostu, setiembre y ochobre. Nesta ocasión la campaña empieza un poco más tarde vistes les llimitaciones económiques y llegales. Los 18.000 euros qu'establez a lo más la figura del contratu menor va dexar reforzar el llabor de los bomberos a lo llargo de trés meses. La campaña especial empezó esti día y va allargase hasta finales d'ochobre, tiempu más qu'abondo p'acabar con cientos de caxellos y que pa la so localización va ser imprescindible la collaboración vecinal. 

Los trabayos son acoyíos como una bendición pol cuerpu de bomberos. Hasta 2019 la retirada de niales de velutina nun esistía, pero dende esi añu y d'ehí p'arriba el númberu d'avisos sobre la esistencia de colonies de la especie nun apara de crecer. "Esti contratu sollivia enforma la carga de trabayu del serviciu", indiquen fontes del cuerpu municipal de bomberos que dirixe Luis Díaz Montes. 

Sacantes sorpresa mayúscula, dende'l Consitoriu dan por fechu qu'esti tipu de servicios van ser necesarios nos próximos exercicios. Ye por eso que, magar hasta la fecha recurrióse a contratos menores d'urxencia p'atayar a los insectos, tán estudiándose alternatives que permitan garantizar un control siguíu d'esta especie que suel abondar especialmente ente xunetu y payares.