La música tradicional asturiana ta de llutu porque acaba de perder a ún de los sos grandes gaiteros. José Fernández García, conocíu como Pepe "Peñanes" pol nome del pueblu de Morcín que lu vio nacer, finó'l pasáu martes a la edá de 85 años, pocos díes dempués de conocer que fuera galardonáu col premiu "Gaiteru 2022", qu'otorga añalmente l'Asociación d'Intérpretes de la Canción Asturianu (AICA) xunto a la Hermandá de La Probe. El 12 de setiembre yera'l día señaláu pa que recibiera'l premiu en La Foz de Morcín. Ta previsto qu'esta fecha se caltenga pa entama-y un gran homenaxe póstumu. 

 Esti neñu de la posguerra empezó a trabayar con 16 años nes mines de carbón, primero como guaje, depués como caballista de la mula "Torda" nes esplotaciones de monte d'Otura y finalmente como tractorista nel pozu Montsacru d'Hunosa, onde se xubiló. 

Dende bien mozu compaxinó'l so oficiu de mineru cola so gran pasión pola música. Con apenes 14 años yá tocaba l'acordión d'oyíu y a mediaos de los años cincuenta del sieglu pasáu, a la edá venti años, empezó con una vieya gaita que-y regaló'l barberu de Santolaya. Más tarde fichólu'l cura por qu'acompañara na misa a les muyeres que la cantaben.

Una imaxe del gaiteru, a la derecha, nos sos inicios musicales.

Pepe "Peñanes" aprendió a tocar dambos instrumentos de forma totalmente autodidacta. El soníu de la so gaita presidió les solemnes funciones relixoses y los pasacalles de les fiestes de los pueblos y parroquies de Morcín acompañáu al tambor, nun principiu, por Fernando Fernández "Nandín", de La Foz, y darréu por Milio "El Torneru", de La Manjoya. 

En 1984 foi nomáu gaiteru oficial del concursu de tonada asturiana que se celebraba en La Muralla de la Quinta, n'Uviéu, cargu que desempeñó n'otros certames de Llugones mesmo que nel prestixosu concursu que tenía llugar en casa Celesto, en Grau. Coles mesmes, foi'l gaiteru de dellos grupos folclóricos asturianos como "Xana" de Posada de Llanera, el de San Cloyo n'Uviéu, el de Santa Cruz de Mieres y "Nocéu" de Trubia, con quien fixo munchos viaxes al estranxeru nos años noventa. 

Esti músicu autodidacta dexó pa la posteridá la famosa "Xota de Pepe Peñanes", compuesta por él mesmu y convertida casique nuna asignatura obligatoria que s'interpreta en numberosos concursos de gaita. 

"Lloraba d'emoción esti día cuando s'enteró que diba recibir el premiu ‘Gaiteru 2022’ y díxome qu'esperaba poder tenese de pies el 12 de setiembre pa poder xubise al escenariu pa recibir el galardón", afirma emocionáu Julio Mallada, cantante de tonada asturiana que-y comunicó la noticia del galardón. El premiu "Gaiteru", que se convoca dende 2009, foi otorgáu n'anteriores ediciones, ente otros, a intérpretes y impulsores de la música asturiana como Vicente Díaz, Xosé Ambás, Tino Arnizu, Javier de Arroes o Diamantina Rodríguez

Anque Pepe Peñanes yá nun va poder xubise físicamente al escenariu de La Foz de Morcín el próximu 12 de setiembre pa recibir el galardón, tol folclore asturianu va axuntase al homenaxe póstumu que-y rindirá l'Asociación d'Interpretes de la Canción Asturiana (AICA) xunto a la Hermandá de la Probe. Ello ye que yá ta confirmada, ente otres, la participación d'Álvaro Álvarez, gaiteru ganador de delles ediciones del prestixosu Concursu Internacional de Gaita McCrimmon en Lorient, quien va tocar nel so honor "La xota de Pepe Peñanes". 

Los sos restos mortales descansen dende esti día nel campusantu parroquial de San Esteban, mui cerca del so pueblu natal de Peñanes, pero la so alcordanza va permanecer siempre viva mientres escuchemos "La xota de Pepe Peñanes".