«¿Cómo ye l'estilu educativu de les families asturianes?». Ye'l títulu d'un informe que se fixo nel entornu educativu asturianu. Y el resultáu ye que les families asturianes intenten potenciar l'autonomía de los sos fíos; la estabilidá del entornu familiar inflúi nel comportamientu de los fíos; los neños perciben más conductes de control parental que les neñes y les madres tresmiten mayor ciñu y calidez que los padres. 

Son dalgunes de les conclusiones a les que se llegaron nel informe –el títulu añede: El papel del control parental n'Educación Primaria– qu'acaba de publicar la Conseyería d'Educación, ellaboráu por dellos autores del grupu Asoced (Analís Sociolóxicu y Cultural de los Procesos Escolares y Educativos) de la Universidá d'Uviéu. Nel estudiu participaron 1.103 alumnos de 3u a 6u de Primaria –ente 8 y 12 años– de 47 centros educativos asturianos distintos y 2.143 proxenitores. 

L'oxetivu del estudiu –que forma parte d'un proyectu nacional– ye analizar dos dimensiones del estilu educativu de los proxenitores asturianos. Per un llau, si se fomenta más l'autonomía de los fíos o si pela cueta establezse un ríxidu control parental sobre ellos. Y per otru, si s'intenta establecer un entornu familiar organizáu y curiosu o se tiende a cayer nun ambiente caóticu. 

L'estudiu revela que los neños desenvuelven distintos tipos de conductes en función de lo que reciben nes sos cases per parte de los sos padres: los llares con estabilidá emocional dan llugar a un menor númberu de comportamientos agresivos nos neños. 

Según les resultancies llograes, ye relevante la diferencia ente lo que perciben neños y neñes por parte de los sos padres. Los varones que participaron nel estudiu afirmen recibir un mayor control, que se manifiesta por casu en castigos o amenaces si nun se porten bien. Tamién sienten, en mayor midida que les neñes, que se-yos fai sentir culpables si faen daqué mal y que se-yos pon más presión pa tar satisfechos con ellos. Amás, los padres y madres encuestaos amuesen un nivel mediu-altu na motivación pol cuidáu de los sos fíos, esto ye, disfruten cola parentalidá. Les madres amuesen mayores conductes de calidez y empatía que los padres, y tamién establecen redolaes más estructuraes, onde les normes son descrites con claridá.

L'estudiu


  • Participantes. 1.103 neños d'ente 8 y 12 años, de 47 colexos asturianos diferentes, y 2.143 padres y madres. 
  • Conductes de los proxenitores y influencia del entornu. Los padres y madres asturianos fomenten l'autonomía de los so fíos, pero son les madres les que tresmiten un mayor ciñu y calidez. Les redolaes estables amenorguen los comportamientos agresivos de los menores. 
  • Percepción de los menores. Los neños sienten mayor control parental que les neñes por parte de los sos proxenitores.