El Principáu entama un plan de control p'ameyorar la xestión de la población de xabalí col aquel d'apangar l'impactu negativu sobre la sanidá animal y la ganadería. Esta especie incrementa'l riesgu d'entrada y espardimientu d'enfermedaes como'l virus de la peste porcina africana. Amás, la crecedera del númberu d'exemplares xenera perxuicios nos cultivos, na biodiversidá y na seguridá vial.
El xabalín ye una especie montesa con una población que creció de forma destacada nes últimes décades, hasta averase na actualidá a los 48.000 exemplares. Tamién s'espardió notablemente la so distribución xeográfica, a pesar de tar sometíu a una fuerte presión cinexética que, mesmo que nel restu d'Europa, nun resultó suficiente. Un estudiu presentáu l'añu pasáu pola Universidá d'Uviéu a instancies del Principáu asitia en 25.000 los animales que facía falta controlar, una cifra mui perriba a los 10.000 que se valten añalmente al traviés del modelu de la caza social que se desenvuelve na comunidá.
La Conseyería de Mediu Rural y Cohesión Territorial va potenciar, poro, toes aquelles acciones que permitan amenorgar les poblaciones de xabalín. De primeres, fomentando l'actividá cinexética, favoreciendo'l desarrollu de la caza social y facilitando'l relevu xeneracional. Amás, el Principáu trabaya pa flexibilizar y actualizar les condiciones normatives d'esta práctica, con una importante mira de futuru pa los próximos diez años. Igualmente, plania activar toles midíes directes que l'Alministración puede entamar p'amenorgar eses poblaciones, en coordinación colos conceyos, realizando o autorizando controles n'árees específiques so la supervisión de la Guardería del Mediu Natural.
El Gobiernu d'Asturies pretende embrivir asina'l riesgu pal ganáu doméstico, ya inclusive a la población en xeneral, d'enfermedaes que tresmite'l xabalí, como la leptospirosis, la brucelosis, la tuberculosis, la enfermedá d'Aujeszky o la peste porcina. Coles mesmes, estos animales xeneren cada añu permunchos daños nel mediu rural, qu'algamen los 800.000 euros y afecten a cultivos forraxeros como'l maíz. Tamién tán detrás de numberosos accidentes de tráficu, polo que suponen un problema de seguridá vial.
El Principáu considera que los problemes que xenera la fauna montesa son cuestiones tresversales que nun ye yá qu'afecten a sectores específicos como la ganadería o a los habitantes del mediu rural, sinón que s'estienden a tola sociedá, al interferir n'actividaes prioritaries como la producción d'alimentos o la xestión del territoriu.
Col entamu d'esti plan, l'Executivu allinia los sos oxetivos colos del Ministeriu d'Agricultura, Pesca y Alimentación y l'Autoridá Europea de Seguridá Alimentaria. Esti organismu comunitariu encamentó nos sos últimos informes un fuerte control de les poblaciones de xabalí en tola Unión Europea, como única midida eficaz pa controlar la espansión de les enfermedaes que tresmiten.
Nuevu plan de xestión del llobu y propuesta d'estracción en Picos
Al respeutive del llobu, el Principáu va recuperar de manera inmediata'l plan de xestión en tolos sos términos, una vegada que la estratexa nacional asume'l protocolu d'estracción propuestu pol Gobiernu d'Asturies, que dexa recuperar la seguridá xurídica.
Esta selmana diba aprobase'l programa de xestión y control 2022-2023 y, darréu, van alzase los primeros informes de propuesta pa estrayer exemplares, nesti casu dientro del Parque Nacional de los Picos d'Europa. El Principáu aneció na so oposición a la catalogación del llobu nel Lespre. Dende la Conseyería de Mediu Rural y Cohesión Territorial sigue trabayándose dientro del marcu actual, con tol rigor, pa dar respuestes al necesariu equilibriu ente'l caltenimientu de la biodiversidá y el desenvolvimientu de la ganadería estensiva, seña d'identidá d'Asturies.
