Contratu fixu yá nun ye sinónimu d'estabilidá nel empléu. De magar entró en vigor esti añu la reforma llaboral, disparóse'l númberu de trabayadores que roblen nun mes más d'un contratu indefiníu. El númberu multiplicóse por once nel últimu añu. Amás, n'Asturies, la mayoría d'esos contratos fixos yá nun son a tiempu completu: el 57% son a tiempu parcial o fixos discontinuos. 

La reforma llaboral recién introdució cambeos na contratación que busquen una crecedera de la contratación indefinida a cuenta de la temporal. Una de les midíes principales foi la eliminación de la figura del contratu por obra y serviciu buscando que toos aquellos trabayadores que desenvolvíen la so actividá al amparu d'esi contratu migraren a figures de contratación indefinida, especialmente'l contratu fixu discontinuu. "Ún de los resultaos de la reforma ye que, de manera natural, en munchos sectores y empreses ta utilizándose la contratación indefinida pa cubrir necesidaes d'empléu de calter temporal y una de les manifestaciones ye que desque entró en vigor la reforma, mes a mes, vese un importante númberu de persones que, por casu, roblen más d'un contratu indefiníu dientro del mesmu periodu temporal", señala un informe ellaboráu por Randstad Research, el centru d'estudios y analises del grupu de recursos humanos Randstad n'España, que rescampla con datos del Ministeriu de Trabayu que n'agostu fueron 23.247 trabayadores los que roblaron más d'un contratu indefiníu y dende l'entamu del añu la cifra de persones yá algama les 175.183, once vegaes más que nel mesmu periodu del añu pasáu.

L'informe de Randstad Research destaca que la "mayor mortalidá" de la contratación indefinida apréciase n'otru aspeutu: dende'l mes d'abril –cuando entraron en vigor les llendes a la contratación temporal– robláronse n'España casi 3,5 millones de contratos indefiníos, pero la cifra d'afiliaos a la Seguridá Social que trabayen con una relación llaboral sofitada por un contratu indefiníu apenes aumentó nun millón de persones. N'Asturies, dende abril robláronse 44.844 contratos indefiníos pero la cifra d'afiliaos a la Seguridá Social con contratu indefiníu incrementóse en 13.222 persones, según el Ministeriu d'Inclusión. 

Col tresvase de contratos por obra y serviciu a contratos fixos discontinuos los trabayadores ganaron protección, una y bones la indemnización que-yos correspuende cuando se rescinde un contratu fixu discontinuu ye superior a la que recibíen con ún temporal. Sicasí, nos contratos que duren menos d'un mes la diferencia nun ye mui aquello en cuantía. 

N'Asturies aumentaron con fuerza los contratos fixos discontinuos, pero tamién los indefiníos a tiempu parcial. D'esti xeitu, el 57% de los 7.036 contratos indefiníos roblaos n'Asturies el pasáu mes d'agostu yá nun yera a tiempu completu. Esa fórmula d'empléu a tiempu parcial tiende a relacionáse con una decisión voluntaria (pa compaxinar el trabayu con estudios o'l cuidáu de menores), pero según un informe de CC OO d'Asturies "más de la metá de la población ocupada a tiempu parcial declara que se trata d'una opción que nun desea". Acarreta, según el sindicatu, "ingresos insuficientes y menor posibilidá de promoción y accesu a formación".