Los rexistradores de la propiedá avisaron l'añu pasáu de 172 posibles casos de blanquéu de capitales n'Asturies, 47 más que l'añu anterior. Sicasí, el Principáu ye una de les rexones onde menos alarmes suenen, solo perriba de Cantabria y Navarra. Les alertes de blanquéu nel Principáu representaron el 0,6% de les rexistraes nel país.  

El Colexu de Rexistradores de la Propiedá, Mercantiles y de Bienes Muebles d'España entamó en 2016 el Centru Rexistral Antiblanquéu (CRAB), que la so función principal ye reforzar la collaboración coles autoridaes xudiciales, policiales y alministratives encargaes de la prevención y persecución del blanquéu de capitales y tamién del financiamientu del terrorismu. 

Cuando un rexistrador, nel exerciciu de la so actividá profesional, detecta una operación d'apariencia anómala, tien d'unviar una alarma al CRAB. El detonador que llevanta la sospecha puede adoptar múltiples formes: una empresa durmiente que de sópitu recupera l'actividá, la compraventa de viviendes a precios ayenos al enclín del mercáu, vinculaciones con paraísos fiscales, alquisiciones con medios de pagu opacos o movimientos sospechosos d'artículos de luxu. 

Una vegada qu'el CRAB recibe una alerta, analízala y abre una investigación si considera que fai falta . Si ve nicios sólidos de que se ta operando con dineru puerco, alza'l casu al Serviciu Executivu de la Comisión de Prevención del Blanquéu de Capitales ya Infracciones Monetaries (Sepblac), que ye la Unidá d'Intelixencia Financiera d'España y la que n'última instancia unvia a los órganos xudiciales o al Ministeriu Fiscal los espedientes en que la comisión d'un delitu de llavadura de dineru o de financiamientu de célules o grupos terroristes resulta, como poco, probable. 

A lo llargo del añu pasáu, los rexistradores dieron voz de 172 posibles casos de blanquéu n'Asturies (91 d'ellos procedentes de los rexistros de la propiedá y 81 procedentes de los rexistros mercantiles y de bienes muebles). Foi una de les cifres más baxes rexistraes n'España, solo perriba de Cantabria (97) y Navarra (43). Madrid, con 7.352 casos, encabezó la estadística.