Una escultura "real", remocicada en Xixón. Trátase d'un bustu de la reina española Isabel II, que s'alcuentra en plenu procesu de renovación nel taller de caltenimientu y restauración Arcadia, rexentáu pola xixonesa Laura Aylagas. Perteneciente a la Delegación de Defensa del Principáu d'Asturies, la escultura en fierro fundíu data de 1858 y representa a la reina cuando apenes tenía 17 años. Aylagas cunta cómo llegó a les sos manes esti proyectu. "Foi un concursu públicu nel que participamos dellos restauradores", esplica. El bustu, recuperáu de la fábrica de La Vega, atribúyese al escultor Francisco Elías Vallina, director de la Real Academia de Belles Artes de San Fernando, y foi la primer obra del taller de fundición de la Fábrica d'Armes de Trubia. Amás, fíxose una copia en fierro pa festexar la visita de la monarca a la ciudá d'Uviéu. 

Laura Aylagas, formada na Escuela Superior d'Arte del Principáu d'Asturies y rexente d'Arcadia dende 2015, esbilla les dificultaes qu'esperimentó la escultura, sometida a múltiples estudios primero de dar entamu a la so restauración, que la so duración total va algamar les cinco selmanes. "Tuvo munchos años albentestate y nun estáu de caltenimientu deficiente", declara Aylagas, que señala que ye "básico" realizar un analís sobre'l tipu de corrosión que careció col pasu de los años. "Primero fáense los analises, inhíbese la corrosión, llímpiase y protéxese la escultura por que nun haya problemes nel caltenimientu", desenvuelve la restauradora, que llamenta'l deterioru carecíu pola pieza a lo llargo de más d'un sieglu.

El bustu d'Isabel II.

Ún de los aspeutos más llamativos de la obra ye l'impactu de bala que presenta na zona inferior, producíu na Guerra Civil. L'impactu va caltenese pa guardar la so autenticidá y exercer de marca histórica. "El Ministeriu de Cultura, propietariu del bustu, pidió que se dexara como testigu históricu", apunta Aylagas, qu'añede qu'esta circunstancia "nun interfier na obra". 

Laura Aylagas, especializada en restauración pictórica, nun duda n'amosar la so allegría por entamar esta xera, qu'encara con muncha ilusión. "Abultóme que yera un proyectu bien guapu y una escultura mui interesante", afirma Aylagas, que recibió colos brazos abiertos la llamada de la Delegación de Defensa del Principáu. La xixonesa revela que la pieza "gustó-y especialmente". Coles mesmes, pon en valor la so importancia a nivel históricu. "Ye una figura que naide conocía", comenta sobre la obra, de la que sostien que "ye una manera de que la xente vea que tenemos un patrimoniu ricu". "Ye una pieza perinteresante", axunta Laura Aylagas. 

Como esplica la xixonesa, el proyectu alcuéntrase nuna fase entemedia, na que tien especial relevancia la llimpieza de la obra. Pa conocer qué disolventes son amañosos pa llevar a cabu'l procesu, el bustu sometióse a dellos estudios científicos y técnicos, ente ellos un analís de fluorescencia "UV", ún semicuantitativu por "FRX" y otru por aciu d'un microscopiu dixital. 

Tolos procesos efectuaos nel proyectu siguen el protocolu demandáu nel tratamientu de les obres d'arte, de forma que nun esistan tratamientos descomanadamente intervencionistes qu'alterien la integridá de la pieza. Una iniciativa na que Laura Aylagas yá ta enfotada nel so taller, Arcadia, que va allugar la remodelación d'una obra con muncha historia y de gran valor históricu-artísticu pa la rexón.