La música de Elías García pervive. El 14 de setiembre de 2019, fai agora trés años, finó esti prestixosu ornitólogu ya intérprete de buzuki, un históricu de la escena folk asturiana integrante del grupu «Llan de Cubel». Nesti aniversariu, otros dos grandes nomes del folk n'Asturies, Rubén Bada y Pepín de Muñalén, acaben de publicar un cantar inéditu que grabaron con Elías García'l mesmu añu del so fallecimientu.
Naquelles feches, estos dos intérpretes taben trabayando con Elías García nun proyectu musical, que quedó paralizáu pola muerte repentina por causes naturales del reconocíu buzukista, una referencia musical y una persona especialmente querida por tolos integrantes de la escena folk de la rexón.
El cantar titúlase «Esti neñín» y ye una añada de la zona de Cardo, en Gozón. La pieza yá formaba parte del repertoriu de Rubén Bada y Elías García. Esta grabación, qu'agora sal a la lluz formaba parte d'un discu que tamién cuntaba cola participación del flauteru Pepín de Muñalén y del contrabaxista René Ispierto.
Agora, esta tema ye un adelantu del nuevu trabayu en solitariu de Rubén Bada, ún de los instrumentistes folk d'Asturies con mayor proyección internacional y que forma parte d'otros grupos como «L-R» –onde conforma con Leticia Baselgas un dúu que ta revolucionando y actualizando'l repertoriu tradicional– «Calea» o «AÚ».
Bada prepara un discu en solitariu sofitáu nel soníu acústicu y en temes tradicionales. Va ser un trabayu instrumental «más introspectivu y personal» col que va cuntar con numberoses collaboraciones d'otros músicos colos que compartió escena a lo llargo de la so carrera.
