Una asturiana lleva la Lluna a la Tierra. Ye la xeóloga avilesina Abigail Calzada, que tresformó una sala de conciertos de 2.000 metros cuadraos de Luxemburgu nun ambiente llunar. L'oxetivu: facer una competición de prototipos robóticos desarrollaos por empreses privaes y consorcios d'universidaes, qu'albidren por llegar al espaciu. Abigail, a la que fichó va un añu'l Centru Européu d'Annovación en Recursos Espaciales (ESRIC), tuvo al cargu de la simulación. "Recrear l'ambiente llunar foi un retu, sobremanera porque teníemos que montalo tou en trés díes y desmontalo en día y mediu", asegura.
Pa ello, Calzada y el so equipu utilizaron 100 tonelaes d'arena basáltico y delles tonelaes d'un material qu'asemeyara la ilmenita (un mineral de gran importancia como recursu pa la estracción d'osíxenu). Tamién crearon cráteres, asitiaron roques, baxaron la intensidá de la lluz pa xenerar solombres, aplicaron retardos na señal... Tolo indispensable pa reproducir de la forma más fiel posible la Lluna.
La competición entamáronla a comuña l'ESRIC y l'Axencia Espacial Europea (ESA) en plena carrera de les empreses privaes por viaxar a la Lluna. El proyectu constó de dos fases. A la primera presentáronse doce equipos de dellos países miembros de la ESA y clasificáronse cinco, que ganaron un contratu de 75.000 euros pa preparar los sos prototipos pa la segunda fase. La final celebróse apocayá en Luxemburgu, onde trabaya l'asturiana. "Los equipos –esplica Abigail Calzada– tuvieron non solo que demostrar les sos capacidaes robótiques, sinón tamién llevar preseos a bordu pa detectar los depósitos del mineral ilmenita, qu'a güeyu nun s'estrema. Nun foi fácil y, amás, fixímos-yos perder dellos segundos, como asocede na lluna, la señal ente l'operador y el robot". El ganador, que se va conocer nunes selmanes, va recibir más financiamientu pa perfeccionar el so robot y poder asina llanzalu nun futuru a la Lluna.
De too ello sabe enforma la xeóloga avilesina, que trabayó pa la compañía xaponesa Ispace y dedicóse dellos años a buscar el llugar perfectu pa realizar alunizaxes (aterrizaxes). Ello ye que Calzada participó nun proyectu pa señalar el puntu esactu onde tendrá de facelo un rover de los Emiratos Árabes, que, de llogralo la próxima primavera, va convertíse na primer misión privada de la historia en pisar suelu llunar. "Y nun ye la única iniciativa privada que ta entamada", diz la llicenciada en Xeoloxía pola Universidá d'Uviéu, qu'insiste en qu'aportar a la Lluna yá nun ye ciencia ficción, sinón que "ta pasando". Ye real.
Según cuenta, enantes un viaxe al espaciu "solo lu facíen les axencies, agora son les empreses les que lo tán intentando coles mires de llevar la meyora tecnolóxica a la Lluna". Dica agora, puntualiza Abigail Calzada, el primer oxetivu ye comprobar que les compañíes tamién pueden aterrizar nel satélite de la Tierra. El siguiente pasu yá va ser "facer esperimentos científicos y captar a veceros interesaos n'esplotar los recursos espaciales". A esto postrero dedícase na actualidá l'asturiana. ¿Y qué son los recursos espaciales? Calzada esplícalo de forma bien didáctica: "Cuando vas a Estaos Xuníos, por casu, intentes llevar lo mínimo y si te fai falta daqué mérqueslo ellí, ¿non? Pues trátase de facer lo mesmo nel espaciu. Esto ye, nun lo llevar tou a la Lluna o a Marte, sinón esplotar los sos propios recursos".
Gasolinera nel espaciu
La investigadora del Centru Européu d'Innovación en Recursos Espaciales ta enfotada principalmente na busca de combustible. Les posibilidaes que s'acolumbren per delantre son inmenses. "Podría llegase a crear una gasolinera nel espaciu. Agora mesmo viaxar dende la Tierra ye mui caro en términos d'enerxía. Si consiguiéramos tener combustible na lluna, el cohete saldría colo mínimo de la Tierra y fadría parada pa recargar na Lluna y siguir el so viaxe escontra Marte o otru planeta", comenta. Ello ye que yá se fala de la posibilidá d'abrir otra NASA na lluna. "Nun vamos ver una ciudá na lluna en 5 años, pero sí que se tán produciendo munches meyores", afirma Calzada.
Nestos momentos hai una especie de "boom" llunar. L'axencia espacial norteamericana quier volver al cuerpu celeste dempués de más de 50 años dende l'últimu aterrizaxe, que se produció en 1972, y, pa ello, empecipió'l programa "Artemis". El llanzamientu del cohete más potente de la historia, sicasí, sufrió dellos contratiempos y tuvo que se retrasar en dos ocasiones. El tercer (y espérase que postreru) intentu ta previstu pa mediaos d'ochobre. "Artemis" tien como fin l'establecimientu d'una estación orbital y una base llunar permanente pa esplotar los recursos del satélite, y preparar la futura unviada d'humanos a Marte na década de 2030.
