La producción mundial d'aceru contráxose esti añu'l 5,4% hasta xunetu, según avanzó esti día l'asociación mundial de fabricantes World Steel, con Europa como una de les zones del planeta más afectaes, namás per detrás de Rusia (y otros países de la Comunidá d'Estaos Independientes) y Ucrania, que tán en guerra, y del continente africanu. 

Según l'asociación mundial siderúrxica, la producción d'aceru crudo (lingotes, productos semiacabaos y aceru líquido pa fundición) reculó na Unión Europea'l 5,6%, dos décimes percima de la cayida esperimentada globalmente. N'otros países europeos ayenos a la UE l'amenorgamientu de la producción entá foi mayor: cayó'l 6,7%.

Estos datos asoléyense cuando ArcelorMittal, el mayor productor mundial, acaba d'anunciar les paraes productives temporales de fornos altos en Xixón, Dunkerque, Bremen y Dabrowa Górnicza, mesmo que de la planta de reducción directa con hidróxenu d'Hamburgu, amás del allongamientu de la inactividá de l'acería compacta de Sestao, arriendes d'otres midíes en Luxemburgu y otres plantes del Norte y Sur de Francia. La compañía empezó a negociar n'España un espediente de regulación temporal d'empléu (ERTE) por que puedan acoyese a él toles sos instalaciones y sociedaes nel país sacantes la filial Condesa hasta fines de 2023.

Los planes d'axuste obedecen, según ArcelorMittal, a la cayida de la demanda n'Europa, combinada col aumentu de les importaciones d'aceru estracomunitariu a baxu costu por tar escusáu de los elevaos costos ambientales qu'asumen les plantes europees mesmo en midíes correctores como sobremanera pola obligación d'adquirir derechos d'emisión de dióxidu de carbonu. La crisis enerxética, col eleváu costu de la eletricidá y el gas natural por cuenta de la guerra d'Ucrania, les sanciones a Rusia y les represalies de Moscú a la UE, tamién tán solmenando al sector. 

La producción solo aumentó ente xineru y xunetu n'Oriente Próximu (4,4%). Y de los grandes países productores, la fabricación apenes s'incrementó n'India (8%) ya Irán (3,7%). China amenorgóla'l 8% y Xapón el 4,9% (nel conxuntu d'Asia y Oceanía reculó'l 4,8%), EE UU amenorgóla'l 3% (3,2% en toa Norteamérica), en Brasil replegóse'l 3,5% (3,4% nel conxuntu de Suramérica) y Turquía embrivióla'l 6,9%.