"La collecha ta mui adelantada y avanza a grandes reblagos, hai qu'empezar a pañar la mazana darréu". El navetu José María Díaz González, más conocíu como "Pepe'l de Tresali", avisa asina sobre los efectos del calor y la seca nes pumaraes. Los frutos –asegura esti veteranu productor– maurecieron primero del so tiempu y la recoyida en serio va entamar unes selmanes enantes de lo habitual. Va dase entamu asina a una campaña que, polo xeneral, va tar marcada pola escasez derivada de los efectos de la vecería (alternanza biañal de colleches).
"La verdá ye qu'hai poca mazana, pue que hasta daqué menos qu'otros años malos", tercia'l tamién navetu Fran Ordóñez, qu'aprecia como na so finca de Monga tán cayendo al suelu munchos frutos primero del so tiempu, lo que confirma que "la collecha vien adelantada". Ordóñez tamién avisa de que les condiciones meteorolóxiques de los últimos meses, con temperatures elevaes y mui poca agua, contribuyeron a que los frutos d'esti añu presenten altos conteníos d'azucre.
Casimiro Fernández, qu'esti día de tarde trabayaba nun de los sos plantíos de la parroquia de Feleches, en Siero, coincide en qu'esti setiembre tán cayendo al suelu más mazanes de lo que venía siendo habitual. Sicasí, nel so casu, nun tien claro si esta situación obedez a que los frutos tán maduros o a la falta d'agua, decantándose más por esta última hipótesis. "Los pumares tienen la fueya murnia por falta d'alimentu", afirma Fernández, presidente del Club Sierense Amigos de la Mazana, quien per estos díes empieza a realizar los denominaos test de Lugol pa comprobar l'estáu de maduración. La técnica consiste en partir la mazana en dos metaes p'aplica-y una solución de yodu. Si se ponen negres les dos metaes, entiéndese que la fruta inda nun ta llista pa dir al llagar.
Lo que sí apreció esti productor de Feleches ye que delles variedaes de mazana de mediaos d'ochobre presenten una maduración adelantada pa lo que ye normal por estes feches. José María Díaz asegura, pel so llau, que la regona, una de les clases de mazanes más tardíes, casi de finales d'añu, yá ta prácticamente maura nos sos terrenes de Tresali (Nava).
Dende la cooperativa Campoastur, Jorge García difier de la visión que tienen los navetos y afirma que, a nivel xeneral, nun se ta notando que la collecha d'esti añu venga adelantada. "La maduración ta siendo normal. Nós vamos empezar a mayar les variedaes más tempranes a empiezos del mes que vien", indica. Y ye que, al so xuiciu, les pumaraes nun viven una situación d'especial seca, magar precisa que l'agua que se cuenta venga esti vienres puede "venir perbién", como yá paso coles precipitaciones que se rexistraron un par de díes del mes d'agostu.
La collecha de mazana d'esti añu va tar mui per debaxo de la de 2021, cuando, batiendo récords, solo de les 76 variedaes acoyíes a la Denominación d'Orixe Protexida (Dop) recoyéronse un total de 8.360.391 kilos, colos que se producieron 6,1 millones de llitros de sidra controlada pol conseyu regulador. Les pumaraes adscrites a la marca Sidra d'Asturies sumen un total de 949,58 hectárees y distribúyense en 810 parceles de 376 productores.
La superficie mediana d'estes parceles controlaes pola Denominación d'Orixe Protexida ye de 0,6052 hectárees, destacando como, del total, el 71% (579) presenta una superficie d'hasta una hectárea y un 41% nun algama la media hectárea. "Esta circunstancia ye representativa de la realidá del cultivu de les pumaraes de sidra n'Asturies, caracterizáu por un acusáu minifundismu consecuencia de les condiciones orográfiques y productives", sorrayen dende'l conseyu regulador de la Denominación d'Orixe. El so oxetivu ye doblar la producción de mazana y a 'ellaboración de sidra acoyida a la marca nel plazu de cuatro años. Pa ello, abulta fundamental dir amenorgando la incidencia de la vecería nes pumaraes, mesmo que "llograr un marcu estable de precios razonables" pa los productores de mazana de la rexón.
