El sector servicios d'Asturies vivió un branu de recuperación. Sicasí, la crecedera de los negocios al respeutive de los años anteriores, atrabancaos pola pandemia de coronavirus, ye inferior al de la media nacional. Cuando menos asina lo espeyen los datos publicaos esti día pol Institutu Nacional d'Estadística (INE)

El sector servicios asturianu, nel que tien un importante pesu la hostelería y el comerciu, aumentó les sos ventes en xunetu un 12,1% al respeutive del mesmu mes del añu pasáu, mentanto que l'empléu xubió un 2,4% interañal, según l'INE. Con ello, no que va d'añu'l sector alzó la so facturación una media del 17,6% y incrementó los niveles d'ocupación un 3,3%.

Esta meyora produzse dempués de que'l pasáu añu'l sector servicios n'Asturies fuera quien a aumentar un 14,7% les ventes y un 1,5% l'empléu depués del esbarrumbe rexistráu en 2020 por mor de la crisis sanitaria de la covid, que provocó una cayida de la cifra de negociu del 12,5% y del empléu del 3%. 

El sector recupérase, pero a un ritmu inferior al del conxuntu del país, onde los servicios alzaron les ventes en xunetu un 18,3% (seis puntos más que n'Asturies) y l'empléu un 4% (1,6 puntos más), colo que nel acumuláu del añu rexistra meyores del 22,7 y el 4,8%, respectivamente. 

La medría de la facturación d'esti branu n'Asturies ta venceyáu a unos bonos resultaos d'ocupación turística. Sicasí, dende la patronal Otea destacóse que les resultancies viéronse afectaes bultablemente "pola enorme xuba de la enerxía y el gas y de les materies primes, que se multiplicaron por dos y por trés en munchos casos, faciendo que la rentabilidá de los negocios nel branu de 2022 sía de les peores de los últimos años". Por casu, dende Otea apuntóse que nel agospiamientu la meyora nel preciu mediu de les habitaciones nun compensó "nin con muncho" la medría de los gastos fixos, y na restauración foi "entá peor".