La Conseyería de Cultura, Política Llingüística y Turismu llanzó cuatro llinies d'ayudes en materia de patrimoniu cultural. El Boletín Oficial del Principáu (Bopa) publicó'l llunes pasáu la convocatoria p'apoyar la promoción del patrimoniu material y tamién p'actividaes venceyaes a archivos de tradición oral ya inmaterial.
El plazu de presentación de solicitúes va tar abiertu hasta'l día 10 d'ochobre y el presupuestu global d'estes subvenciones xube a 40.000 euros, según indiquen dende'l Principáu.
La Dirección Xeneral de Cultura y Patrimoniu convoca dos llinies d'ayudes p'apoyar la promoción patrimonial: una destinada a empreses y otra p'asociaciones y particulares. Les subvenciones tienen por oxetu apoyar actividaes pa promocionar los valores vinculaos al patrimoniu asturianu, al traviés de proyectos que favorezan l'aprendizaxe y la promoción, amás de la conocencia pola sociedá.
Ente los criterios de puntuación tán factores como la realización d'actividaes nel ámbitu rural, la implicación de les comunidaes locales o l'apoyu a les audiencies nueves y a la llucha contra la resquiebra de xéneru, ente otros.
Igualmente, el Bopa publica otres dos llinies d'ayudes pa promover actividaes de difusión d'archivos de tradición oral y inmaterial. Tamién nesti casu existe una convocatoria específica pa empreses y otra destinada a particulares y asociaciones.
