El Muséu del Pueblu d'Asturies de Xixón va acoyer esti sábadu'l IX Día de la Reciella, con un completu programa d'actividaes, dende xuegos tradicionales a cosplay, moda, música o TikTok, nes que l'asturianu va ser la llingua vehicular.

Asina lo destacaron na presentación de la programación nel Conceyu de Xixón, el director de la Fundación Municipal de Cultura, Miguel Barrero, el director xeneral de Política Llingüística del Principáu, Antón García, y David Guardado, en representación de l'asociación Reciella.

Barrero destacó la celebración d'esti día dende hai más d'una década --en 2020 nun se celebró pola pandemia de la COVID-19-- al ser una fiesta sobre l'usu del asturianu en cualquier ámbitu de la vida.

Coles mesmes, señaló que la Oficina de Normalización Llingüística de Xixón va mangar una carpa, como n'ediciones anteriores, na que van dar información y van repartise dellos materiales.

Per otru llau, García rescampló que la Reciella ye un "exemplu pioneru" y que'l fechu de surdir de la sociedá civil ye'l camín pa una normalización llingüista afayadiza.

Amás, apuntó que dende la Conseyería de Cultura siempre apoyaron el Día de la Reciella y avanzó qu'esi apoyu va ser "más eficaz", de forma que se va abrir una collaboración pa qu'esti eventu siga creciendo. Coles mesmes, mostró'l deséu de qu'esta celebración sía un "éxitu" y que pueda axuntar a les families pa disfrutar de la xornada.

Guardado recordó l'apoyu institucional del Plenu del Conceyu a esta celebración, que ye un día pa "facer coses, más que pa reivindicar", según él. Y dexó claro que lo que pretenden ye que l'asturianu sía una llingua que siga "viva", que sía una llingua más.

Sobre la programación, señaló qu'a les actividaes yá tradicionales como xuegos o baille, y a otres que s'incorporaron na edición anterior como cosplay --al cargu de Shiro Ychigo--, súmense novedaes como introducción a TikTok --pa mayores de 13 años--, un desfile de moda de Ringo Rango o una "pinchada" de música xamaicana.

Tamién va haber una muestra de Valtu, deporte tradicional asturianu, xuegos de mesa, axedrez, xuegos de chapes, taller de baille en familia o la danza prima, amás del 'Mercadín de Lliteratura y Música, Moda y Más'.

Guardado destacó que con estes actividaes nun se busca convertir l'asturianu nel tema, sinón nuna forma de comunicase. Pa zarrar la xornada, va haber un conciertu d'Alfredo González.

Coles mesmes, apuntó qu'el lema d'esti añu ye 'L'asturianu, conéctate', teniendo en cuenta que los mozos usen Internet davezu pa comunicase. Pol Día de la Reciella editóse un vídeu obra de Pablo Quiroga.