El primer vinu albariño d'Asturies collechóse y embotellóse na "cuna" de la mazana, en Villaviciosa. Más en concretu, na localidá de Fuentes y de la mano de María Victoria Fernández-Caveda. Una pequeña paradoxa nun Principáu eminentemente sidreru, pero nel qu'históricamente tamién tuvo sitiu'l vinu. Ello ye que los documentos revelen que la viticultura n'Asturies remonta dellos sieglos atrás, cola esistencia de viñeos yá nel sieglu VIII, so la influencia principal del monesteriu de San Vicente d'Uviéu.
Eses mesmes fontes señalen qu'ente'l sieglu XI y el XVI la fabricación de sidra nun tenía muncha importancia, "produciéndose, sicasí, vinu abondo pal consumu de la población", tal que recueye un artículu d'Antonio Blanco publicáu na revista "Cubera" nel añu 1984. Entá más, nel sieglu XI los monxos de l'abadía de Fuentes yá cultivaben les sos vides na finca "Los Viñones", allugada en dicha localidá. Esa parcela ye citada por Francisco Feo Parrondo nel so estudiu sobro "El viñedo en Asturias", de 1986, y hai constancia d'esos llabores en dos inscripciones grabaes en piedra nos cargaderos de la puerta de la sacristía de la ilesia parroquial.
Diez sieglos dempués, l'actual propietaria d'esos terrenes, María Victoria Fernández-Caveda, embarcóse na aventura de recuperar el viñéu. De resultes, les vides volvieron cultivase en Fuentes, dando llugar a la primer collecha d'albariño, un vinu siempre acomuñáu a Galicia, de la que se tien rexistru n'Asturies.
Pa ello, Fernández-Caveda encargó en primer llugar al inxenieru agrónomu José Cuevas González que dirixiera un estudiu vitivinícola esperimental, empobináu a conocer qué variedaes d'uva blanca y qué portainxertos yeren los afayadizos pal terrén y el clima de la finca.
Con éses, tal que esplica Cuevas, na primavera del añu 2018 "llantáronse cepes d'albariño, riesling, albarín blancu, gewurztraminer y godello, siendo la mayoritaria, con más del 85 por cientu del plantíu, la primera d'elles". Caúna de les variedaes ta inxerida sobre distintos portainxertos americanos. "Ye col aquel de comprobar l'adaptación de caún d'ellos al terrén de la faza", detalla l'inxenieru.
Esperimentóse, coles mesmes, con dellos sistemes de conducción de la vide, amás de con trés tipos de podadura. Tamién s'analizó minuciosamente el suelu, con ensayos d'abonáu, marcos de plantíu, tratamientos fitosanitarios y manexu de la vexetación de les vides y de les cais ente les llinies de plantíu.
Característiques
Un trabayosu llabor d'investigación que tien enseñao al traviés del manexu de les cepes "diferencies significatives nel comportamientu de la planta" y que sirvió pa "conocer les respuestes de les distintes variedaes, la so producción y les característiques del mostiu", sostien José Cuevas.
Asina, va un añu, na seronda de 2021, realizóse la primer vendimia y vinificación, llográndose "un vinu albariño bien arumosu y frutal, con una personalidá propia influyida pol clima atlánticu", esplica l'espertu.
Enagora, esti vinu nun va poder comercializase, al tar la finca inscrita nel rexistru vitivinícola como esperimental. El consumu hasta l'alquisición de derechos va ser pa la familia y la so redolada.
Esti primer albariño producíu n'Asturies rinde homenaxe a María Victoria Fernández-Caveda llevando'l so nome (Mariví). Ye la muyer que recuperó'l viñéu na finca "Los Viñones", faciendo honor al nome de la finca y a la historia de la viticultura en Fuentes. L'oxetivu inmediatu ye siguir creciendo y poner nel mapa a Villaviciosa non yá como gran epicentru de la producción de mazana y de sidra, sinón tamién d'eses vides que llevaben sieglos "dormíes" nes sos fasteres.
