Espectáculos, talleres y actividaes paraleles como'l primer alcuentru de les escueles y academies dedicaes a la danza n'Asturies integren el programa de Danza Xixón, que se va celebrar en dellos espacios de la ciudá ente'l 8 y el 30 d'ochobre. La XXII Muestra de danza contemporánea y artes del movimientu va recibir a 20 compañíes, que van representar 24 funciones, repartíes ente l'Antiguu Institutu, la Escuela de Comerciu, el teatru Xovellanos, La Llaboral, los Centros Municipales Integraos, l'Espacio Escénico El El Huerto y tamién na cai. "Ye un eventu de ciudá, pa distintos tipos de públicos, por que la danza s'alcuentre cola xente", destacó esti día Manuel Ángel Vallina, conceyal de Cultura. 

Precisamente esa misión, la d'intentar llegar especialmente a la xente nuevo, ye ún de los retos que se marquen na Asociación de Profesionales de la Danza d'Asturies, como esplicó la so presidenta, Elisa Novo: "Detectamos un problema de nuevu públicu, los qu'empezamos viendo danza entá siguimos. Pretendemos crear conexón. Por eso, vamos facer un proyectu piloto d'un equipu de siete mozos, d'ente 15 y 25 años, que se comprometieron a asistir a les funciones p'analizalo dempués. Espero que sían más nel futuru". 

Idoia Ruiz de Lara, directora de programes de la Fundación Municipal de Cultura de Xixón, dixo, sobre la programación que se va ver dende'l día 8 d'ochobre, qu'habrá un amiestu ente "compañíes con una gran trayectoria y otres emerxentes", y analiza la parte más técnica d'esti eventu: "Podrá vese danza contemporánea, de circu o urbana. Preséntase muncha bayura nos discursos, hai muncha diversidá nes narratives". 

"Metamorphosis Dancie", qu'integren Iratxe Ansa ya Igor Bacovich, col so espectáculu "CreAcción" van poner el puntu de partida a Danza Xixón el 8 d'ochobre nel Xovellanos. A otru día, en La Llaboral podrá vese "Geometría del Alma", de "Teatru Plus". El zarru al festival podránlu'l sábadu 29 y domingu 30 d'ochobre la compañía "Teatre de la Caixeta", cola obra "Estrellas" n'Espacio Escénico El Huerto. Amás, va haber talleres, ente ellos ún dedicáu a la danza española y el flamencu por parte de Sara Calero, y otru sobre nímesis, que van impartir Estrella García y Miguel Quiroga.