El proyectu 'Retablu rural', una mirada realista a l'aldea contemporánea de Pablo X. Suárez va ser el beneficiariu de la Beca Asturies qu'apoya una residencia de creación lliteraria n'A Coruña pa un escritor en llingua asturiana o gallego-asturianu ente'l 1 y el 31 de payares del 2022. La Conseyería de Cultura, Política Llingüística y Turismu impulsa la iniciativa en collaboración cola Residencia Lliteraria 1863.

El xuráu, que formaben los escritores Francisco Álvarez, Esther Prieto y Miguel R. Monteavaro, ganador de la beca na convocatoria anterior, destacó la propuesta narrativa mui bien estructurada y con una mirada novedosa sobre'l mundu rural asturianu. El xuráu destaca la calidá de tolos proyectos presentaos.

Asitiaes nel corazón d'A Coruña, les instalaciones de la Residencia Lliteraria 1863 funcionen dende 2019 pa facilitar la máxima concentración ya inspiración nel trabayu lliterariu, acoyendo autores de mui diverses partes del mundu. La Residencia ta al llau d'onde nació la Real Academia Galega da Lingua y d'onde residieron Emilia Pardo Bazán, Rosalía de Castro o Pablo R. Picasso.

Pioneru y animador de les nueves tendencies de poesía oral n'Asturies cola creación de les Timbes Poétikes nel añu 2009 y la organización del festival Sacavera Sound, Pablo X. Suárez (Siero, 1981) ye, amás d'escritor, llicenciáu en filoloxía hispánica pola universidá d'Uviéu (2004), especialista en llingua asturiana (2006) y técnicu en normalización llingüística na Mancomunidá Comarca de la Sidra dende l'añu 2009.

Hasta la fecha tien publicaos los poemarios 'Pop Retórika' (Glayíu, 2009) y 'Cómo evitar el apocalipsis' (La novia de nadie, 2016) en castellanu; y 'Asturiana Beat' (Trabe, 2005), 'El sistema débeme una chocolatina' (Suburbia, 2011) y 'Little Babilonia' (Saltadera, 2018), premiu Xuan María Acebal 2017, n'asturianu.

La so obra narrativa ta recoyida nel volume de relatos 'Yoni y yo' (Suburbia, 2010), Premiu de la Crítica d'Asturies en 2010, amás d'en revistes como 'Lliteratura', 'Campo de los Patos' o 'Formientu'. Con ella foi premiáu en varios concursus de cuentos.

Apaez en delles obres colectives y antoloxíes. Como articulista, tien collaborao en medios como'l selmanariu Les Noticies, Diagonal, Nortes o El Salto diario. Na so faceta de poeta escénicu, mantién el proyectu El Velcro xunto col productor de música electrónica Dudu García, y tien pasao per varios festivales internacionales