L'Academia de la Llingua publicó les bases pa la concesión del III Premiu Nacional de Lliteratura Asturiana, que cada tres años reconoz el papel d'un escritor nel caltenimientu de la cultura d'Asturies y que va entregase coincidiendo col Día de les Lletres del 2023.
El Premiu Nacional de Lliteratura premia'l conxuntu d'una trayectoria lliteraria y la so contribución a la dignificación social del asturianu. Nes dos ediciones anteriores premióse a Xuan Bello (2017) y Xuan Xosé Sánchez Vicente (2000). El gallardón tien una dotación económica de 5.000 euros, un medayón distintivu y la publicación d'una antoloxía.
Van poder presentar candidatures al premiu, l'Academia de la Llingua Asturiana, les entidaes culturales y llingüístiques del dominiu llingüísticu o cualquier de los miembros del xuráu, quince díes enantes de la celebración de la xunta.
La presentación va facese al traviés d'escritu dirixíu a l'ALLA, onde se conseñen los méritos lliterarios de la persona propuesta, xunto a una muestra representativa de la so producción escrita --alredor de 50 páxines--. Les propuestes y la documentación habrán apurrise enantes del día 9 d'avientu de 2022.
