La cultura sidrera asturiana va ser definitivamente la candidata que va presentar España en marzu de 2023 énte la Organización de les Naciones Xuníes pa la Educación, la Ciencia y la Cultura (Unesco) pa la so declaración como Patrimoniu Mundial Inmaterial. Asina lo ratificó esti día'l Conseyu de Patrimoniu Históricu Español na xunta semestral celebrada en Zaragoza, a propuesta de la Conseyería de Cultura, Política Llingüística y Turismu del Principáu. Ye la segunda vegada que s'escueye a la sidra asturiano como la candidata española a la Unesco, pero la elección tuvo que repitise dempués de que la so candidatura nun pudiera entrar pal ciclu 2022-2023. Agora va ser evaluada pa 2023-2024, como yá se daba prácticamente por fecho a falta del necesariu trámite d'esti día. 

Ello ye que'l Conseyu de Patrimoniu designara yá va un añu la cultura sidrera como candidata pa entrar a formar parte de la Llista Representativa del Patrimoniu Mundial Inmaterial. Sicasí, espliquen dende'l Principáu, "la normativa de la Unesco torgó que fuera evaluada nel ciclu 2022-2023 por cuenta de qu'establez un cupu añal de 55 candidatures a estudiar del total de les presentaes, amás de conceder preferencia a aquelles naciones poco o nada representaes nuna Llista de Patrimoniu Mundial Inmaterial na qu'España tien yá 20 elementos inscritos". D'ehí la imposibilidá de que la cultura sidrera fuera siquier evaluada nesti ciclu y la necesidá de retardar la so candidatura pal 2023-2024. 

Ello ye que'l Gobiernu d'Asturies "yá avanzó en xunetu que la evaluación de la so propuesta aplazábase hasta 2023". El procedimientu esixe que'l Conseyu de Patrimoniu Históricu Español designe cada añu la representación del país qu'opta a esta reconocencia, polo qu'adoptó esti día otra vuelta esti alcuerdu nuna xunta a la qu'asistió'l director xeneral de Cultura y Patrimoniu del Principáu, Pablo León. L'espediente ellaboráu pol Principáu, coles actualizaciones correspondientes a les acciones desenvueltes a lo llargo del últimu añu, volverá rexistrase ante la Unesco en marzu de 2023. 

Trátase d'un trabayu que provien d'enantes del actual Gobiernu de Barbón, que tomó'l testigu del mesmu. "Esti informe supunxo más de nueve años de trámites que s'entamaron colos preparativos pa la declaración de la cultura sidrera como Bien d'Interés Cultural Inmaterial, recoyida nel decretu 64/2014, de 11 de xunetu. Darréu, el Gobiernu d'Asturies constituyó un grupu de trabayu, formáu por representantes de la Denominación d'Orixe Protexida (DOP) Sidra d'Asturies, antropólogos, historiadores y estudiosos, que s'encargó de desenvolver l'espediente técnicu", recordaron esti día dende'l Principáu, que recalca l'impulsu que podría dar a la cultura ya industria sidrero entrar na prestixosa llista de la Unesco: "Reforzaría la estima que la comunidá siente hacia'l productu más identitariu".