La Nueva España

La Nueva España

Contenido exclusivo para suscriptores digitales

L'Arqueolóxicu celebra la incorporación de la estela de Bodocena, "una pieza única"

"Ciérrase un círculu que s'abrió va trenta años", destaca la historiadora Margarita Fernández Mier, descubridora de la llábana

El Museo Arqueológico incorpora una lápida funeraria del siglo I hallada en Belmonte de Miranda

El Muséu Arqueolóxicu incorpora una llábana funeraria del sieglu Ia atopada nel conceyu de Miranda. Miki López

Para ver este vídeo suscríbete a La Nueva España o inicia sesión si ya eres suscriptor.

El Muséu Arqueolóxicu incorpora una llábana funeraria del sieglu Ia atopada nel conceyu de Miranda. Franco Torre

La estela de Bodocena yá relluma por fin nel Muséu Arqueolóxicu d'Asturies. La singular pieza, una llábana funeraria d'una neña de 12 años fechada nel sieglu I de la nuesa era y atopada en Vil.laverde (Miranda) fai casi trenta años, instalóse na segunda planta del muséu, compartiendo espaciu con otres dos esteles de la dómina y con un cuadru de les mines de Boinás, tamién de Miranda. Esti día, na presentación de la estela, la directora del Arqueolóxicu, María Antonia Pedregal, y la conseyera de Cultura, Política Llingüística y Turismu, Berta Piñán, celebraron la incorporación a los fondos del muséu de "una pieza única" gracies a que "se fixeron les coses bien" al xestionar una acción que permitió integrar la pieza al patrimoniu de tolos asturianos. 

"Ciérrase un círculu que s'abrió va trenta años, y alégrome que depués de trenta años esti equipu fixera les coses bien, porque va trenta años nun se fixeron asina. Anque tamién ye verdá que yera una situación bien distinta", cavilgaba, nel mesmu Muséu Arqueolóxicu , Margarita Fernández Mier, la descubridora de la pieza . 

Güei Catedrática d'Historia Medieval na Universidá d'Uviéu, Margarita Fernández Mier era una moza investigadora cuando trabó contactu, per primer vegada, cola estela de Bodocena. Yera 1993 y la pieza apaeciera en baltando una cuadra qu'adquiriera, xunto a otros dos inmuebles, un ganaderu de Vil.laverde, Ceferino Marrón, pa facer ellí una nave. Aquella "piedra con letres", como -y dixeron a Fernández Mier, taba mangada nuna puerta, a manera de cargaderu y Marrón guardola por cuenta de la bona calidá de la piedra y a esa singular inscripción que, ensin sabelo él, falaba d'una neña muerta, Bodocena, nel misteriosu "castellum Agubrigense" casi dos mil años enantes. 

"Aquella ‘piedra con letres’ víase perfectamente. Yo tenía veinti y pocos años, y dirixíame la tesis Javier Fernández Conde, que me derivó a Diego Santos por que m'ayudara cola llectura. Él díxome : ‘Vaya usté con esto al IDEA (güei RIDEA) y que-y lo publiquen darréu’", recordó Fernández Mier. 

La medievalista informó al Muséu Arqueolóxicu yá nel momentu del so descubrimientu, ya inclusive negoció con Ceferino Marrón pa la cesión o venta de la pieza al muséu. Pero la falta de fondos de la institución frenó la venta y, una vegada que l'afayu salió en prensa, la pieza empezó a espertar l'interés de los coleccionistes, y dellos contactaron con Ceferino Marrón pa facé-y importantes ufiertes. Una d'elles algamó la cifra de cinco millones de pesetes de la dómina, anque Marrón, quiciabes pensando que'l valor d'aquella "piedra con letres" yera mayor, acabó por nun la vender. "Teníala llantada na so güerta, creo qu'inclusive se notaba el cercu cuando llegó al muséu", rellata . 

El morriendo Ceferino Marrón, la estela pasó a manes de los sos herederos, que llevaron la llábana, paez ser, a una panadería de la so propiedá, y finalmente foi adquirida pola Conseyería de Cultura, depués d'una xestión que fructificó fae cerca de dos años, anque hasta agora nun se supiera d'ello. Foi a finales de 2020 cuando la estela de Bodocena l'adquirió Cultura, por una cantidá de 7.500 euros más el IVA correspondiente, y el 15 de xineru de 2021 depositóse nel Arqueolóxicu. A lo llargo de toos estos meses, la pieza llimpióse y restauróse polos técnicos del muséu . 

Más allá de toa esta peripecia, la importancia de la estela de Bodocena ta nel usu d'esi antropónimu indíxena inéditu na rexón, y la referencia al patronímicu o filiación, mesmo que la inclusión d'un símbolu, una "C" invertida, que s'interpreta como una alusión al llugar de procedencia, y que tamién se puede ver n'otres dos llábanes, recuperaes en Salas y A Veiga.

Compartir el artículo

stats