La bona noticia na Asturies empobinada yá a baxar del millón d'habitantes –tal como informó'l mes pasáu LA NUEVA ESPAÑA a tenor de los anteriores datos estadísticos demográficos– diz que la rexón sigue liderando a 30 de setiembre la medría de les nacencies n'España. El repique del 2,81 por cientu que l'Institutu Nacional d'Estadística (INE) asigna al Principáu nel datu publicáu esti día, correspondiente a la comparanza de los nueve primeros meses d'esti añu colos del pasáu, supon una rebaxa al respeutive del ritmu d'ascensu de los meses anteriores, pero sigue siendo'l más altu del país –tienlo sío ininterrumpidamente dende xineru– ya inda otorga un insólitu lideralgu a una rexón en grave depresión que se caltuvo ensin posa a lo cabero de la natalidá n'España dende los años ochenta del sieglu pasáu. El problema qu'escurez acolumbrar una meyora sigue tando esti añu na mortalidá, que permanez asitiada en númberos de récord históricu y creció nun 7,14 por cientu nel mesmu periodu, esllendo asina l'efectu del ascensu de nacimientos.

En total, según datos de la Sociedá Asturiana d'Estudios Económicos ya Industriales (Sadei), de xineru a septiembre Asturies sumó 3.680 allumamientos, una cifra que supera la del mesmu periodu de 2021 y 2020, pero que nun puede facer nada contra los 10.564 fallecimientos. La resultancia de la diferencia ente nacíos y muertos da una perda de 6.884 habitantes por motivos puramente vexetativos, que tamién ye la más elevada de la serie y que por ella namás yá asitiaría a Asturies per debaxo del millón d'habitantes. Esto yá asocedía col datu actualizáu a la fin d'agostu, teniendo en cuenta de que la última cifra oficial de población total son 1.006.193 contabilizaos a 1 de xineru d'esti añu. Esa cuenta, sicasí, entá nun puede ser real, porque falta por computar el resultáu del otru gran soporte de la demografía, el saldu de los movimientos migratorios, y esta magnitú nun ta inda disponible más acá del zarru de 2021. Inda nun ye posible asina determinar, hasta qu'esi datu s'actualice, si la rexón rebaxó efectivamente la barrera del millón. 

Hai que tener en cuenta que nos últimos años el productu de les migraciones suel ser na rexón moderadamente positivu y correxir llevemente a l'alza la perda vexetativa. Per esta vía, según los últimos datos oficiales disponibles, Asturies amortigañó la so cayida en 2.427 persones en 2021 y hasta en 4.757 en 2020… mentanto s'actualicen esos datos, la rexón namás puede conocer a ciencia cierta, anguaño, lo que pierde pola so crisis de natalidá: una media de 25 habitantes al día como resultáu de la diferencia ente les trece nacencies y los 38 fallecimientos que se contabilizaron como promediu nos nueve primeros meses d'esti añu. Si se toma como referencia l'últimu datu ciertu y confirmáu de población total, qu'espeya una perda real d'alredor de 6.700 habitantes a lo llargo de 2021, Asturies cerraría esti añu con una cifra que taría por bien poco per debaxo del millón, pero pa sabelo cierto entá hai qu'esperar.