El Gobiernu d'Asturies entama 'Xuntoiro', un alcuentru cultural alredor del gallego-asturianu que va axuntar propuestes lliteraries, musicales y escéniques p'amosar la vitalidá creativa d'esta llingua.
La Conseyería de Cultura, Política Llingüística y Turismu impulsa esta iniciativa, que va celebrase n'A Veiga, y qu'inclúi una amplia programación d'actividaes gratuites pa tolos públicos.
El Xuntoiro va celebrase los díes 26 de payares y 3 d'avientu y va tener como principales localizaciones l'auditoriu y la casa de cultura, gracies a la collaboración del Conceyu d'A Veiga.
El programa va principiar el sábadu cola xornada "Riada lliteraria", qu'inclúi un paséu pela ría del Eo cola participación de los autores Yolanda Castaño, Sergio Gutiérrez Camblor, Miguel Rodríguez Monteavaro, Belén Rico Prieto, Carmen Siñeriz y Ugia Pedreira.
L'Auditoriu Félix Menéndez va acoyer l'estrenu de 'A lluz, Orión y a nova lluz', una propuesta lliteraria, musical y escénica, que conecta la poesía coles formes nueves d'espresión audiovisual del sieglu XXI.
La xornada va completase cola mesa redonda 'A narrativa eonaviega', moderada por Ricardo Saavedra, y na que van participar Rafael Cascudo, Emma Méndez y Christian Lanza. Finalmente, va presentase'l llibru 'Contos eonaviegos', editáu por Cultura pa celebrar la 43 Selmana de les Lletres Asturianes, y qu'axunta 28 collaboraciones con lliteratura en prosa del estremu occidental d'Asturies.
El públicu infantil va convertise en protagonista'l sábadu 3 d'avientu, con una xornada enllena d'actividaes gratuites pa tolos públicos, como cuentacuentos, talleres, teatru y conciertos.
