Investigadores de la Universidá d'Uviéu desenvolvieron imanes qu'actúen d'un xeitu asemeyáu a los diodos na electrónica y que pueden actuar bidireccionalmente na tresmisión de señales magnétiques. Si'l diodu constitúi un elementu fundamental na electrónica, estos dispositivos pueden facer lo propio na tresmisión d'información por aciu de señales magnétiques, lo que supon importantes aforros en consumu d'enerxía. L'estudiu dirixolu un equipu de la Universidá d'Uviéu y del Centru d'Investigación en Nanomateriales y Nanotecnoloxía (CINN), en collaboración con científicos d'Italia, Polonia y Francia. L'afayu foi publicáu na revista "ACS Nano", de máximu impactu na so área de conocencia .
Según espliquen los investigadores Luis Manuel Álvarez Prado y Javier Ignacio Díaz Fernández, del departamentu de Física de la Universidá d'Uviéu, estos dispositivos magnéticos (dientro de la denominada "magnónica", la tresmisión d'información por aciu d'ondes magnétiques) apurren delles ventayes: "Son compatibles cola tecnoloxía del siliciu, tienen menor gastu que los sos primos electrónicos, nun pierden característiques cola falta de suministru eléctricu y pueden ser reprogramables fácil, por aciu d'estímulos esternos de baxa intensidá", esplica Díaz Fernández.
El dispositivu discurríu polos científicos asturianos parezse a un diodu (tresmite información nun solu sen), pero les sos propiedaes son reconfigurables, pudiendo establecese en qué sen se quier que tresmitan la información, una propiedá que se consigue gracies a los materiales emplegaos. "Ye de fabricación cenciella, rique menor gastu enerxéticu, apenes tien perdes eléctriques y, al contrariu que los transistores, nun-y fai falta alimentación continuo cuando nun ta operativu", señalen. Esto ye, aforru d'enerxía nunos tiempos nos que la eficiencia resulta clave.
