Les compañíes asturianes de construcción naval siguen engordando les sos carteres de pidíos y ente xineru y setiembre d'esti añu atroparon 27 de los 30 nuevos contratos de construcción de barcos roblaos n'España, el 90%. Según datos del Ministeriu d'Industria que correspuenden al tercer trimestre del añu, los grupos Armón y Gondán tienen acumulaos en cartera 37 pidíos de buques de los 61 de tou'l sector nacional, el 60%.
El grupu Armón tien una cartera de pidíos de 33 buques. Les sos filiales en Navia y Burela van construyir 18 barcos, ente los que destaquen los nuevos ferris rápidos pa la compañía italiana Liberty Lines; Auxiliar Naval del Principáu, con sede en Veiga (Navia), va fabricar cinco embarcaciones de salvamentu y patrulleres; Armón Vigo tien en cartera cinco barcos, y Armón Xixón tien otros cinco en sumando nel tercer trimestre un nuevu pidíu, el nuevu ferry rápidu con motores de gas pa Balearia que va llevar el nome de la científica asturiana Margarita Salas y que va ser asemeyáu al "Eleanor Roosevelt", barcu construyíu tamién en Xixón y que foi galardonáu apocayá col premiu "Construcción naval más destacada de 2021" qu'otorga l'Asociación d'Inxenieros Navales y Oceánicos d'España.
El grupu Gondán cerró'l tercer trimestre del añu con una cartera de pidíos de cuatro barcos de sofitu pa parques eólicos marinos pa la noruega Edda Wind, pero va una selmana l'astilleru de Figueras anunció un quintu contratu cola mesma compañía .
