La editorial Delallama publicó la novela histórica 'Vincitur inimicus', de Xandru Martino. La obra ta ambientada na corte d'Alfonsu II y arranca col retiru del rei al monesteriu d'Ablaña, onde va facer amistá con un monxu que recibe l'encargu d'escribir la so crónica.

'Vincitur inimicus' ye una historia de tensiones polítiques nun tiempu nel que'l Reinu d'Asturies yera ún de los más poderosos del mundu. Trátase de la segunda novela de Xandru Martino depués de 'Nunn', que narra la invasión romana d'Asturies.

Una historia que se desenvuelve nun reinu qu'abarca dende'l País Vascu a Galicia y que llucha por fixar les llendes del sur énte l'amenaza de los sarracenos, al tiempu qu'afita los sos llazos diplomáticos col imperiu de Carlomagnu.

L'escritor, con títulos como 'De Ceuta a Sarayevo' (1995) o 'A la gueta l'esbardu' (1997), ye llicenciáu en filoloxía francesa, diplomáu en maxisteriu y especialista d'asturianu pola Universidá d'Uviéu, amás d'académicu correspondiente de l'Academia de la Llingua Asturiana dende l'añu 2021.