Iniciativa pol Asturianu acaba de presentar a la sociedá Inspección Técnica de Vehículos d'Asturies S.A. (ITVASA) un escritu pa esixir la presencia de la llingua asturiana y del gallego-asturianu na cartelería y nes informaciones de les distintes estaciones de la compañía n'Asturies.
La organización tamién reclama "l'usu de la toponimia oficial de los conceyos na cartelería y nel formulariu pa escoyer estación pa pasar la revisión de los vehículos, señalando en nota de prensa que "na mesma web de la sociedá, incumplen la toponimia oficial de Xixón y de Xarrio (nel conceyu de Cuaña)".
Iniciativa pol Asturianu considera que ye importante avanzar nel usu de la toponimia tradicional nuna sociedá del Gobiernu autonómicu, amás de dar pasos pa que l'asturianu tea presente tamién nel espaciu web d'ITVASA, amás de na cartelería.
