El primer métodu de gaita asturiana ye mui anterior a les instrucciones de Xuacu Amieva de finales de los años setenta del sieglu pasáu, qu'hasta agora se teníen por pioneres na materia. Un estudiu de la investigadora Inés Estrada Vázquez desveló la esistencia d'un documentu ellaboráu en 1962 pol maestru Juan José García Renedo, director daquella de la Banda de Música de Villaviciosa y fináu en 2000, nel que, con grafíes musicales non convencionales, recuéyense les pautes pa facilitar l'aprendizaxe y la posterior interpretación a la gaita de la Salve de la Virxe del Portal. "Ye un documentu únicu n'Asturies, nun tando conseñáu nengún otru asemeyáu datáu con anterioridá", sorraya Estrada, que va donar una copia manuscrita al Conceyu de Villaviciosa .
El denomináu "Estudio de la gaita acoplado a la Salve" foi ún de los puntos claves de la conferencia sobre Renedo y la so composición más icónica ("La Salve a la Santina, Nuestra Señora la Virgen del Portal, patrona de Villaviciosa") que la mesma Estrada ufiertó esti día nel Teatru Riera. La organización cuerre por cuenta del Real Institutu d'Estudios Asturianos (RIDEA) y del Conceyu de Villaviciosa, so la coordinación d'Andrés Martínez Vega.
Inés Estrada, investigadora de la Universidá d'Uviéu asitiada en Bimenes, desenvuelve nestos momentos una tesis doctoral titulada "Didáctica y metodología de la gaita asturiana. De la oralidad a la escrituración", baxo la tutela del profesor José Antonio Gómez Rodríguez, del departamentu de Musicoloxía de la Universidá y actual decanu de la Facultá de Filosofía y Lletres. Foi precisamente esti trabayu lo que la llevó a afondar na figura de Renedo y la so "Danza del Portal", obra compuesta en 1953 y que dende l'añu siguiente cántase y baillase delantre de la imaxe de la patrona mesmo na xornada central de les fiestes nel so honor como nel Festival de la Mazana, por cuenta de la bendición del primer zume del añu. Estrada define esta composición como "un conxuntu musical-dancísticu que tien un interés históricu y etnomusicolóxicu qu'encaxa nes actividaes y espresiones colectives consideraes Patrimoniu Cultural Inmaterial, dientro de los ámbitos de la tradición oral, les creencies, rituales festivos y otres práctiques ceremoniales, mesmo que les manifestaciones musicales sonores".
Nacíu nel municipiu cántabru de Castro Urdiales en 1911, Juan José García Renedo llogró en 1939 la plaza de director de la Banda de Música de Villaviciosa, en sustitución del fináu Ramón Alonso Vallina. Conocíu como'l maestru Renedo, desempeñó un gran llabor mesmo al mandu de la banda como nel ámbitu de la educación y creación musical. Foi un autor prolíficu, anque non enforma conocíu, que tomó dellos xéneros musicales, dende lo sinfónico a les creaciones pa bandes, xéneru nel que destacó especialmente, pasando per composiciones de corte popular y, inclusive, zarzueles d'ambiente asturianu.
La obra "Salve a la Santina, Nuestra Señora la Virgen del Portal, patrona de Villaviciosa" foi definida pol mesmu García Renedo como una "oración coreográfica" inspirada na "Salve en Alabanza de Nuestra Señora del Portal, Patrona de las Apostólicas Misiones del Real Colegio Seminario de Villaviciosa". Ye una composición fechada en 1791 y que recitaba'l coru de los flaires franciscanos del conventu de Villaviciosa n'honor a la Virxe .
"La Salve de Renedo ye una obra complexa y de gran interés musicolóxicu", sostien Estrada. Compúnxose dafechu pa banda sinfónica, gaita, tambor, coru a cuatro voces mistes y dances al estilu del sieglu XVIII. Dende'l so estrenu en 1954 baillase con gran devoción n'honor a la Portalina, siendo una de les principales señes d'identidá de les fiestes patronales de la Villa. La pandemia del coronavirus torgó la so interpretación na plaza del Conceyu en 2020 y 2021, anque sí se cantó na ilesia a la fin de les celebraciones relixoses.
