Pescudar sobre los oríxenes del conocíu como castru del picu Castiellu de la Mortera. Esi ye'l principal oxetivu de la primer campaña arqueolóxica promovida nesta zona de La Ribera pola asociación Vestigia col patrociniu del Conceyu riberense. Un equipu d'espertos encabezáu polos arqueólogos Juan Muñiz y Alejandro Sánchez empezó va dellos díes los trabayos colos que pretende estenar les dudes sobre si se trata d'un asentamientu medieval o, pela contra, remóntase a tiempos anteriores a la ocupación romana.
Los trabayos van allargáse hasta'l 15 d'avientu y los responsables crucen los deos pa dar con importantes afayos. "Esperamos qu'apruza dalgún material qu'oxalá nos dexe datar el tiempu nel que se creó l'asentamientu", indica Muñiz, medrosu de que'l mal tiempu de los últimos díes y les previsiones d'agua retrasen y enzanquen la escavación.
L'asentamientu yá lu reconoció José Manuel González el 7 de mayu de 1961, pero dende entós nun hubo investigación arqueolóxica nenguna d'importancia. Foi agora cuando'l Conceyu decidió asumir los 14.000 euros del costu de la campaña, a la que van siguir delles visites empobinaes coles que los arqueólogos van tratar d'esplicar a vecinos y visitantes la importancia de los afayos y les sos teoríes sobre'l pasáu de les construcciones investigaes.
