Asturies, a lo cabero d'España en gastu n'I+D al par de les rexones del sur y les isles

El Principáu invirtió l'añu pasáu 203 euros por habitante n'investigación y desarrollu, lloñe de la media de 362 euros n'España

inves

inves

Sixto Cortina (Traducción)

Asturies tien un gastu n'investigación y desarrollu (I+D) de 203,01 euros por habitante y añu, mui per baxo de la media nacional, de 362,7 euros, y namás perriba d'Andalucía, Castiella-La Mancha, Estremadura y les comunidaes insulares: Isles Baleares y Canaries. Asina lo señala la estadística sobre actividaes d'I+D correspondiente a 2021, que publicó esti día l'Institutu Nacional d'Estadística (INE)

L'estudiu, que nun ye comparable dafechu al d'años anteriores porque se modificó parte de la metodoloxía p'afayala a les qu'utilicen n'Europa, tien como principal oxetivu midir los recursos económicos y humanos destinaos a investigación por tolos sectores económicos en que s'estrema la economía: empreses, alministraciones públiques, enseñanza superior ya instituciones privaes ensin fines d'arriquecimientu. 

En 2021, Asturies gastó n'I+D un total de 204,54 millones d'euros, lo que representa'l 1,2% del total n'España, y tenía 3.385 trabayadores dedicaos a esta actividá, el 1,4% del total nacional. El gastu n'I+D interna por habitante n'Asturies foi de 203,1 euros, perlloñe de les comunidaes qu'encabecen la estadística, que son País Vascu (765,5 euros), Madrid (670,4) y Navarra (591,9), y per baxo de la media nacional (363,7). Ye la rexón del norte d'España con menor gastu . 

Magar el cambiu metodolóxicu, la Fundación Cotet fixo esti día una comparanza de los resultaos de la estadística del INE de 2021 colos d'años anteriores y señaló que pasaos más de diez años namás cuatro rexones nun recuperaron los niveles d'inversión nin los d'empléu previos a la crisis financiera: Asturies, Canaries, Cantabria y La Rioxa. 

Les empreses son les que más inverten n'investigación y desarrollu n'Asturies. El so gastu en 2021 foi de 108,62 millones d'euros, percima de los 66,09 millones de gastu de la educación superior (Universidá), los 29,41 millones de les alministraciones públiques y los alredor de 42.000 euros de les instituciones privaes ensin ánimu d'arriquecimientu.