Nupa, l'aula máxica del colexu Santu Domingo

Columnes de burbuyes, hamaques, difusores d'arumes, un proyeutor o efectos de lluz. Nun ye que seya una sala recreativa, sinón que ye l'aula Nupa, destinada a aguiyar los sentíos y la relaxación de los menores d'Educación Infantil y primeros cursos de Primaria que dende esti añu s'entamó nel colexu Santu Domingo. Un espaciu separáu en requexos qu'usa una metodoloxía activa, basada nel descubrimientu y l'esploración llibre pa construyir una redolada al serviciu de los más pequeños del centru. «Al ser un espaciu nuevu cargáu d'un ambiente positivu y relaxante, ta resultando mui motivador pa los neños», indica Sara Bárcena, directora del colexu . 

L'aniciu del proyectu funde los sos raigaños n'otra iniciativa del centru, el programa «Brotes», qu'apuesta pola estimulación temprana y que ta concebíu pa procurar un procesu de neurodesarrollu acordies a les necesidaes de cada neñu, respetando les sos característiques, moliciones, ritmu de maduración y estilu d'aprendizaxe. «“Brotes” intervien en campos tan importantes como la llingüística, l'área cognitiva, l'área socio-afeutiva y l'área sensoriomotriz y lo que se pretende con Nupa ye intervenir d'un xeitu específicu nesti últimu campu», insiste Bárcena. 

Dos proyectos que siguen caminos paralelos y que nacieron pa dar respuesta a necesidaes que presentaben los alumnos. «Les maestres d'Educación Infantil y primeros cursos de Primaria participaron a lo llargo de dos años na formación del programa “Brotes”. Según diben afondando nello, vieron la necesidá de facer colos alumnos actividaes que favorecieren la estimulación sensorial y d'ehí surde la idea de crear un aula dotada de recursos que fixeren posibles les dinámiques que permitieren trabayar d'un xeitu específicu esti área». 

Sesiones de 30 minutos y grupos de 14 alumnos por sesión p'aguiyar la vista, l'olfatu, l'oyíu, el tactu y el gustu, empobinaos por docentes d'Educación Infantil y primeros cursos de Primaria, faen que los menores aporten al aula «encantaos polo qu'ellí atopen», sorraya Bárcena, quien destaca la formación de los profesores responsables del aula. «Son docentes que participaron nuna llarga formación los dos años postreros sobre les meyores de la neurociencia aplicaos a la educación».