Tamargo sal al espaciu y saluda a los nuevos astronautes

L'artista xixonés Marcos Tamargo fixo la so primer incursión nel espaciu esterior. Un encargu del Muséu Nacional de Ciencies Naturales de Madrid púnxolu na tesitura de tener que pintar a un astronauta nel espaciu y eso llevólu, a la so manera, a campos inexploraos. 

"L'espaciu ye un tema que nunca enantes tratara nes mios pintures. El muséu dióme delles ayudes pa poneme en situación, como piedres y materiales que nunca utilizara, y tengo que reconocer que m'encantaron. Tuvi que trabayar con colores a los que nun taba avezáu, con degradaciones de negros y azules perinteresantes; tuvi que reflexar esos vacíos y tamién eses lluces mui potentes...", encadena a manera d'esplicación.

Disfrutó del procesu de realización y tamién de la fase previa, esto ye, del tiempu d'investigación que pidíen los dos cuadros que-y encargaron. Ún d'ellos –queda dicho– reflexa l'espaciu; l'otru ye un homenaxe en forma de semeya a la primer muyer negra que salió al espaciu, Mae Jemison. En dambos casos son, según espliquen dende'l Muséu, trabayos basaos na técnica MoveArt de Tamargo, que consiste en poder ver dos cuadros distintos sobre'l mesmu llenzu; ún d'ellos visible con lluz natural y otru na escuridá. 

Les obres de Tamargo formen parte de la esposición que s'inauguró esti día en Madrid, sol títulu de "Astronautes", y que seguro que va tener munchos adeptos nes feches vacacionales. Y más nun momentu en que la carrera espacial vuelve tar de plena actualidá n'España cola designación de dos nuevos astronautes: Pablo Álvarez y Sara García. Dambos compartieron inauguración con Tamargo y dalgún qu'otru diálogu ensin que faltara la mención a Asturies y "lo cerquina" que cai de Lleón, la tierra de procedencia de los dos escoyíos pola Axencia Espacial Europea . 

Los dos astronautes fueron efusivos nel encamientu de la esposición, que va permanecer abierta nel muséu madrilanu hasta'l 28 de mayu y pretende ser un acercamientu a la vida y el trabayu nel espaciu, mesmo qu'inspiradora por que más mozos, y sobremanera muyeres, arimen a les carreres científiques y a los estudios espaciales.

Pa ello la esposición inclúi unos 200 oxetos ente los que destaquen una replica del "precursor de tolos traxes espaciales", diseñáu pol inxenieru español Emilio Herrera, répliques de la Estación Espacial, distintos rovers que percorrieron Marte, semeyes firmaes por munchos astronautes que pisaron la Lluna, y un montón d'oxetos más que paga la pena ver", cuntaben Pablo Álvarez y Sara García. "Buscar un güequín y venir hasta equí", pidía con ánimu la rapaza lleonesa, consciente de que van ser munchos los que quieran ver una roca llunar, traxes orixinales de cosmonautes o material d'investigación en Marte. Inclusive se buscó un requexu pa dedica-ylu a Ramón y Cajal, centráu na misión de la NASA de 1998 pal estudiu del cerebru n'ingravidez.

Suscríbete para seguir leyendo