Hunosa va construyir en Mieres la mayor planta d'enerxía solar d'Asturies

El futuru d'Hunosa ta na enerxía, y más concretamente, nes anovables. Y a la apuesta de la hullera pública pola xeotermia -tecnoloxía de la que ye pionera-, la biomasa -col tresformamientu de la central térmica de La Pereda- o l'hidróxenu verde, axúntase tamién la enerxía solar. La empresa yá sopelexara la so intención de desarrollar un parque de casi 12 megavatios de potencia na escombrera de Pumardongo, en Mieres. Sicasí, nun ye l'únicu proyectu yá que según desveló a LA NUEVA ESPAÑA el presidente de la empresa, Gregorio Rabanal, la hullera yá tien enriba la mesa una segunda iniciativa muncho más ambiciosa: la instalación de paneles fotovoltaicos, tamién nel conceyu de Mieres, pa crear un parque de 50 megavatios. Anque l'allugamientu esactu entá ta por definir, el proyectu supondría la creación del mayor parque fotovoltaicu d'Asturies.

Na última edición de la Feria d'Internacional de Muestres d'Asturies (FIDMA), Hunosa yá presentó'l primer proyectu, el de la escombrera mierense de Pumardongo. Un parque de 11,3 megavatios que yá se convertiría nel mayor d'Asturies. Nesta iniciativa, la empresa pública va de la mano de dos importantes socios: Imsa y Maetel. Amás, la reutilización d'esta escombrera cobra especial relevancia, yá que hasta l'añu pasáu, yera utilizada pa depositar los estériles de la térmica de La Pereda. Sicasí, la hullera invirtió 140.000 euros na restauración d'esti espaciu, qu'agora va sirvir p'allugar el so primer parque fotovoltaicu. 

Una fonte d'enerxía, la solar, que ganó la partida a la eólica tocantes al desenvolvimientu de proyectos por parte d'Hunosa. Y ye que según el mesmu presidente de la empresa pública, los parques d'aeroxeneradores que se plantegaren yá va años pa diversos allugamientos propiedá de la hullera nes Cuenques, nun son anguaño vidables. "Les midíes que fiximos indíquennos que nun ye vidable y entá nun puede aprovechase'l recursu eólicu", afirmaba Rabanal. Unes conclusiones a les que tamién llegaron empreses piqueres na fabricación d'aeroxeneradores, que tamién visitaron la zona, y qu'almitieron que magar les meyores tecnolóxiques, entá nun hai un modelu de molín que faiga posible rentabilizar el recursu eólicu de les Cuenques.

Sicasí, lo que sí se va a poder aprovechar ye'l sol. "Evidentemente, esto nun ye Almería, pero sí que vamos poder aprovechar esi recursu solar pa xenerar enerxía", señalaba Gregorio Rabanal na entrevista concedida esta selmana a LA NUEVA ESPAÑA. Y a Pumardongo, va axuntase una nueva iniciativa en Mieres que busca siguir afondando nel negociu enerxéticu que va ser, per otra parte, el futuru de la cada vegada menos hullera.

Hidróxenu

El presidente de la empresa reconocía tamién que'l futuru pasa ensin duda pola enerxía, y ente esos proyectos, esta mesma selmana conocióse que la empresa yá tien fondos pa desenvolver la so primer planta d'hidróxenu anovable. L'Institutu pa la Diversiciación y Aforru d'Enerxía (IDAE) concedió casi 4,2 millones pal proyectu que desarrolla Hunosa xunto a Duro Felguera, Nortegas y Alsa, y que se va instalar nel pozu Fondón, en Llangréu. Enagora , la iniciativa alcuéntrase na fase de tramitación urbanística, y darréu, según el mesmu Rabanal, va entamar la llicitación y les obres de construcción de la planta.