L'aeropuertu cierra'l tercer meyor añu de la so historia: 1,45 millones d'usuarios en 2022

L'aeropuertu d'Asturies consiguió cerrar 2022 coles terceres meyores cifres nos sos 54 años d'historia, solo per detrás de les rexistraes en 2007 y 2008. Fueron 1,45 millones los usuarios que despegaron o aterrizaron l'añu pasáu nes instalaciones de Santiagu'l Monte, lo que supon un 74,9 por cientu más que l'añu anterior, y el 2,6 por cientu más qu'en 2019, enantes de la pandemia de covid-19. Esti llogru foi posible gracies a un final d'añu espectacular: nel mes d'avientu contabilizáronse nel aeropuertu asturianu 139.217 pasaxeros, el meyor rexistru nesi mes de tola historia, dende la so apertura, en 1968. Los datos d'avientu suponen un 50 por cientu más que los rexistraos nel mesmu mes de 2021, y un 34,6 por cientu más que trés años primero. 

Solo otru aeropuertu español de la Península presenta númberos positivos al respeutive de 2019, el de Santiago de Compostela, que'l so númberu d'usuarios disparóse esti añu (cuasi'l doble que l'añu pasáu y un 11,4 por cientu más qu'en 2019). Les resultancies del aeropuertu asturianu garren entá más valor si se tien en cuenta que'l númberu de pasaxeros nel conxuntu de los xestionaos por Aena n'España asitió l'añu pasáu un 11,5 por cientu per debaxo del de 2019. Los espertos del sector señalen como principales razones de les escelentes cifres del aeropuertu castrillonense la medría del tráficu nacional y, nos últimos meses del añu, l'apertura de nueves rutes al estranxeru.