Los asturianos saquen 1.000 millones de los sos aforros pa encarar la inflación
Los depósitos bancarios na rexón entá guarden 3.200 millones más qu'enantes de la pandemia por cuenta de les restricciones d'actividá
La fola d'inflación xenerada pol españíu de la guerra n'Ucrania ta menguando los aforros de los asturianos. Dende marzu de 2022 hasta setiembre, últimu mes del que tien datos el Bancu d'España, los asturianos sacaron de los sos depósitos bancarios más de 1.000 millones d'euros. Sicasí, les cifres d'aforru entá tán perriba de les rexistraes enantes de la pandemia del coronavirus. El dineru embalsáu colos confinamientos y les restricciones d'actividá ta permitiendo encarar la carestía y entá hai en depósitos casi 3.300 millones d'euros más qu'enantes de la pandemia .
Asturies cerró 2022 con una xubida añal del índiz de precios al consumu del 5,8%, según los datos del Institutu Nacional d'Estadística (INE) publicaos esti día. La contención del preciu de la enerxía y los carburantes nos últimos meses del añu llimaron la inflación, que llegó a superar les dos cifres trés meses consecutivos (10,3% en xunu, 11,1% en xunetu y 10,6% n'agostu). Estes medríes de precios fueron cimeros a l'alza de los salarios. Los sueldos afitaos por conveniu incrementaron n'Asturies el 2,9% nel 2022, según el Ministeriu de Trabayu, mentanto que los salarios de los funcionarios xubieron el 3,5% y el salariu mínimu interprofesional el 3,6%. Poro, la perda de poder adquisitivu foi xeneralizada (d'ella llibren los pensionistes poles actualizaciones afitaes en relación al IPC) y ta teniendo repercusión sobre l'aforru de los asturianos.
Según les estadístiques del Bancu d'España, los asturianos teníen al zarru de setiembre de 2022 un total de 28.973 millones d'euros en depósitos bancarios. Son 1.021 millones menos qu'en marzu de 2022, cuando acababa d'españar la guerra n'Ucrania que de momentu disparó los precios de la enerxía y los carburantes, y provocó una fola inflacionaria qu'algamó tolos niveles de la economía. Sicasí, la mengua de 1.021 millones nos aforros de los asturianos entá ye mui inferior al engorde de los depósitos bancarios a lo llargo de la pandemia. Entá queda un marxe de 3.290 millones pa cayer a les cifres d'aforru previes al coronavirus.
De los 28.973 millones que tienen los asturianos en depósitos, 26.650 millones tán a la vista y 2.323 tán a plazu. Estos últimos depósitos rexistraron una mayor cayida na so cuantía coincidiendo cola falta d'incentivos. Magar la xubida de los tipos d'interés, los grandes bancos nun entraron nuna puya p'atraer veceros en cuenta de retribuir el pasivu porque, según apunten fontes del sector financieru, cunten con lliquidez asgaya por mor del aforru xeneráu na pandemia.
La cuantía de los depósitos bancarios de los asturianos baxó cola inflación y coles mesmes aumentó la solicitú de préstamos. Al zarru de setiembre de 2022 había n'Asturies 20.464 millones en creitos (escluyendo los del sector públicu), lo que supon 55 millones más qu'en marzu de 2021.
Al respeutive de primero de la pandemia de coronavirus, el creitu aumentó en 2.328 millones d'euros nun periodu nel que se rexistró un importante repique de compraventes nel sector inmobiliariu qu'incrementó la solicitú d'hipoteques.
- Demoledor escrito de la Comisión Europea: asegura que la prórroga del peaje del Huerna fue ilegal
- Las reacciones en Asturias al anuncio de Pedro Sánchez: del "no todo vale" de Barbón, al "victimismo" de Queipo
- Novedades en la obra del nudo de Serín: así queda la circulación
- Estas son las obras que mejorarán el trazado del AVE en Asturias: el calendario que maneja el Gobierno regional
- Por qué una válvula fabricada con tejido de cerdo pone al HUCA a la vanguardia mundial: "Este hospital va a más
- Detenida por estafar 70.000 euros a ancianos en Oviedo y Pola de Siero
- Heridos un ciclista y dos senderistas por sendas caídas en Candamo, Allande y Cabrales
- PP, PNV y Junts votan debatir sobre el lobo, con el PSOE en contra sin "fugas" asturianas