Un vuelu nel tiempu ensin salir d'Uviéu: del Barón Coloráu a los cohetes d'Elon Musk

Una esposición axunta na Delegación de Defensa una estensa colección de maquetes d'aeronaves

Sixto Cortina (Traducción)

Dende'l caza alemán pilotáu pol Barón Coloráu na Primer Guerra Mundial, el triplanu Fokker Dr. I, a los cohetes que se van mandar al espaciu nos próximos años. La esposición "La conquista del cielo" axunta na Delegación de Defensa, na plaza d'España d'Uviéu, maquetes d'aviones, dende los primeros biplanos, a los satélites y cohetes nos que se trabaya anguaño. La muestra de modelismu aereu, entamada xunto col Círculu Aeronáuticu "Jesús Fernández Duro" de La Felguera, podrá visitase hasta'l 30 d'esti mes. 

El globu col qu'el aeronauta llangreanu que da nome a la entidá, nietu del empresariu siderúrxicu Pedro Duro, se convirtió nel primeru en sobrevolar los Pirineos en 1906, abre la esposición. Allugóse na planta baxa del edificiu, onde tamién s'espón l'autoxiru. "Nun se fabricó nengún n'España, nel país nel que nació'l so inventor, l'inxenieru Juan de la Cierva", aseguró Vidarte Laso, autor de les maquetes d'aviones que pueden contemplase na sede de la Delegación de Defensa. 

A unos metros mangó una réplica del llexendariu triplanu que pilotó, ente otros, Manfred von Richthofen, el Barón Coloráu, na Primer Guerra Mundial. Destacó Laso que "a los triplanos facíen-yos falta pilotos mui amañosos porque yeren difíciles de remanar". 

La estructura mesmo d'estos aviones como de los biplanos yera "de madera, recubiertos de tela y piel y en dellos modelos, contaos, nel interior de los cockpit punxeron aluminiu", comentó. El "Concorde", que voló ente 1976 y 2003, tamién ta presente na muestra. Incide Vidarte Laso en que "hubo otros dos aviones supersónicos, unu rusu y un Boeing, que nun llegó a volar". 

Ente les maquetes axuntaes figura'l dirixible "Hindenburg", que foi, apuntó'l comandante Jesús Pina, de la Delegación de Defensa n'Asturies, "destruyíu por una quema cuando aterrizaba en Nueva Jerséi'l 6 de mayu de 1937, lo que causó la muerte de 36 persones, alredor d'un terciu de les que diben a bordu". "Supunxo'l fin de los dirixibles como mediu de tresporte", amestó. 

Na segunda planta les maquetes de José Félix Menéndez permiten afondar na historia de l'aviación militar española ente 1911 y 1939. Ta marcada primero pola guerra del Rif, afirmó. Nos años posteriores "hubo una pretensión de modernizar l'aviación pero la Guerra Civil atayó los proyectos". "Y entós, d'apenes tener aviación pasóse a tener dos", señaló Menéndez, en referencia a la Republicana y la Nacional. Ente les maquetes qu'amuesa figuren les d'aviones suministraos procedentes d'Alemania, la URSS ya Italia. 

Mui cerca, Aníbal Vega distribuyó modelos de satélites españoles realizaos con impresión 3D, dellos a escala. "A partir de 2012 el númberu aumentó considerablemente", sostien. El primera cubesat, un satélite pequenu, llanzóse en 2003 y cinco años más tarde llegábase a los 75, señaló Vega, qu'inclúi na so muestra maquetes de cohetes que se van llanzar más palantre y nos que se trabaya. Ente ellos los modelos detrás de los que tán Elon Musk y Jeff Bezos, o cohetes de China, India o Rusia. 

Dientro de la esposición inclúyense uniformes d'aviadores y una representación de los fondos del muséu del Cueto, en Llugones. Tamién un simulador de vuelu que'l Círculu Aeronáuticu "Jesús Fernández Duro" lleva a los colexos. "Permite volar nun avión, nuna avioneta y en distintos llugares", indicó'l presidente de la entidá, José Manuel Martín Ferrer. La esposición "La conquista del cielo" puede visitase de llunes a vienres de 9.00 a 13.30 hores y esiste la opción d'una visita empobinada.