Pozos con muncho fondu: una visión fotográfica intimista sobre'l trabayu mineru

La historiadora del arte María del Amor Díaz presenta la muestra na Escuela de Mines d'Uviéu

Una visitante repara nes fotografíes de la esposición «¿Dónde están los hombres?, ¿Dónde las mujeres?». | FERNANDO RODRÍGUEZ / LNE

Una visitante repara nes fotografíes de la esposición «¿Dónde están los hombres?, ¿Dónde las mujeres?». | FERNANDO RODRÍGUEZ / LNE / L. Landázuri

Sixto Cortina (Traducción)

La minería asturiana, pero dende la perspectiva de l'ausencia. Ye'l puntu de partida de "¿Dónde están los hombres?, ¿Dónde las mujeres?", una repasada al traviés de fotografíes del pasáu industrial a escenes que busquen poner en valor "el nuesu patrimoniu, ensin facer de menos la parte humana", indica María del Amor Díaz, historiadora del arte, fotógrafa y responsable de la muestra. 

Una llamada d'atención recoyida en 36 imaxes espuestes na Escuela de Mines d'Uviéu, sobre espacios agora vacíos y que nel pasáu llegaron a allugar "muncha vida llaboral, social, emocional... ye una especie d'homenaxe a les presencies qu'enantes ocupaben esos llugares, a les persones que tanto trabayaron y tan duramente vivíen", indica la fotógrafa, con raigaños nel conceyu d'Ayer que tuvieron que ver enforma na so obra. "Tola mio familia ye d'esa zona, por ello, tengo un venceyu especial con esa actividá y con esi tipu de vida". 

Como esperta en xestión cultural, el llabor de documentación y desenvolvimientu de la muestra foi un trabayu gratificante realizáu a lo llargo del añu pasáu, una selección d'instantánees qu'espertaron l'interés de los que la visitaron. "Los que tienen visto les imaxes salieron plasmaos pola visión íntima que reflexen d'un oficiu tan sacrificáu y físicu", añede.

Pozos con mucho fondo

La fotógrafa María del Amor Díaz posa na Escuela de Mines. / L. Landázuri

Y qué meyor soporte que la imaxe pa poder tresmitir la parte más humana de la minería. "Nun ye abondo con palabres pa describir esos escenarios. La fotografía yera la canal ideal pa rescamplar lo que tenía en mente. Ye una ferramienta perfecto pa remembrar esi pasáu industrial que tanto m'inspira y nel que centré bona parte de la mio carrera", señala Díaz, que la so ilusión ye poder enseñar la so esposición nel centru cultural de Moreda. "Llevar les mios obres a casa sería una forma perfecta d'homenaexar esa tierra y tolo que nos dio. Ye l'espaciu más afayadizu". 

El pozu San Antonio y el pozu Santiago, dambos allugaos n'Ayer, fueron les localizaciones nes que se realizaron les instantánees nes que puede apreciase dende la indumentaria que los mineros utilizaben nel so día a día, hasta parte de la ferramienta necesario pa entamar "un llabor trabayosu que puede dase a conocer a la perfección al traviés del arte", conclúi María del Amor Díaz, de la so esposición que va poder visitase hasta'l 10 de febreru.