Dos vuelos selmanales ente Asturies y Múnich

La compañía Lufthansa dobla los enllaces cola capital bávara, qu'entama pel branu, al respeutive de lo anunciao pol Principáu

Viaxeros nel aeropuertu d'Asturies.

Viaxeros nel aeropuertu d'Asturies. / Mara Villamuza

Sixto Cortina (Traducción)

La compañía Lufthansa anunció'l vienres pasáu que va operar la ruta d'Asturies a Múnich dos vegaes a la selmana, y non una como indicara nun primer momentu. L'aerollinia xermana va entamar la conexón cola capital bávara na próxima temporada aérea de branu, que va empezar a finales de marzu. Esti día nun taben entá a la venta los billetes a Múnich. 

Lufthansa, que tamién va empezar a operar en poco más de dos meses a Frankfurt, presentó los sos planes p'Asturies na Feria Internacional de Turismu (Fitur), que se celebró en Madrid. Leticia Alcalá, directora comercial de Lufthansa n'España, señaló que coles trés conexones selmanales previstes dende Frankfurt (los miércoles, vienres y domingos) y les dos dende Múnich (los martes y los sábados) la compañía va cubrir "casi tola selmana". 

L'empresariáu asturianu y les Cámares de Comerciu rescamplaron el so contentu pol aterrizaxe de Lufthansa n'Asturies, y pola apertura de les dos a Alemania. Frankfurt y Múnich, los dos mayores hubs de l'aerollinia, que faen posible más de 200 conexones a tol mundu. 

La llegada a Asturies de Lufthansa, segunda aerollinia europea en pasaxeros tresportaos per detrás de Ryanair, supon rematar un vieyu deséu de les autoridaes autonómiques, que yá negociaron cola operadora alemana en 2014, ensin ésitu. La conexón con Frankfurt ye amás una antigua demanda de los empresarios asturianos. Los conocedores del sector albidren que la llegada de Lufthansa va permitir al aeropuertu asturianu averase, y quiciabes hasta superar, el máximu históricu añal de pasaxeros, rexistráu en 2007, cuando sumó 1,56 millones pasaxeros. Una cifra de la que nun tuvo bien separáu en 2022, cuando contabilizó 1,45 millones d'usuarios, el tercer meyor rexistru de la so historia

Con estes dos nueves rutes, Asturies va cubrir 27 destinos directos a nueve países, con una especial meyora de les sos comunicaciones estratéxiques. Lufthansa va axuntáse asina a les cinco compañíes que yá operen nel aeropuertu d'Asturies: Binter, Iberia , Ryanair, Volotea y Vueling.