De la basura a la paré de casa: la corteya de castaña, el nuevu aislante pa construcción que s'investiga en Llaíñes

Biomímesis. Una palabra complicada pa esplicar daqué cenciello: asonsañar los diseños de la naturaleza p'ameyorar los diseños humanos. N'obres públiques, construcciones, fabricación de materiales non contaminantes... Esti llabor d'investigación desarróllenlu en Llaíñes (Sobrescobio) los componentes del Llaboratoriu Biomiméticu, l'arquiteuta Marlén López y el diseñador Manuel Persa. El trabayu empieza a dar los sos frutos, precisamente usando ún de los frutos más abondosos y representativos d'Asturies: la castaña, que la so corteya y pelleya tán probándose pa usase como nuevu material. El grupu Giconsime (Grupu d'Investigación de Construcción Sostenible, Simulación y Ensayu) de la Universidá d'Uviéu ta evaluando les sos propiedaes, qu'abulten prometedores, sobremanera como material aislante, pa ser utilizáu n'obres, y como fieltru. De la basura, a la paré de casa.

Tal qu'indiquen Persa y López, "na nuesa busca por fabricar nuevos materiales d'orixe biolóxicu, afayamos qu'al esfarrapar la corteya de castaña, el so interior aterciopeláu conviértese nun material asemeyáu al algodón". Depués d'unes pruebes prometedores, quedaron llueu ensin materia prima, pero un anunciu que colgaron nel tablón del pueblu fixo qu'esto camudara. Por aciu de les redes sociales, quedaron apolmonaos, con recoyida nel Conceyu, con vecinos, colexos, l'asociación La Benéfica de Rodrigo Cuevas... "Gracies a la collaboración desinteresada d'un montón de persones, esti añu llegáronnos corteyes dende toa Asturies, coles que siguimos faciendo pruebes".

La corteya entemezse con aglutinantes naturales y agua, un trabayu que realicen na so sede de Llaíñes, xuntura de cocina –con "termomix" incluyida– y llaboratoriu científicu. "Facemos delles recetes, pa probar cuáles son les sos característiques", esponen. El material resultante "ye una masa fácil de trabayar sobre moldes, inclusive coles manes". Tien "un tactu suave y firme al tar formáu por pequeños filos algodonosos, que permiten crear pieces compactes y difíciles de romper". 

Esti material de castaña ta permitiendo fabricar "biotextiles y biocerámiques, colos que diseñamos dellos oxetos de moblame, amás de paneles de los que se ta analizando la so transmitancia acústico y térmico". El so usu ye prometedor pa sustituyir munchos de los actuales materiales aislantes, que davezu se fabriquen con productos químicos. "Les comunidaes onde'l cultivu de la castañal tien mayor importancia son Asturies, Galicia y Castiella-Lleón, con una producción total d'unes 16.000 tonelaes, colo que tendríemos un residuu cercanu y accesible que podemos utilizar como materia prima. 

La piel de naranxa ye otru de los residuos orgánicos colos que s'investiga nel Llaboratoriu Biomiméticu. "Esta ye la nuesa forma de trabayu, atopar nuevos materiales útiles, que sían naturales y aprovechen lo que yá hai. Too puede tener una nueva vida".