L'actriz avilesina Sonia Vázquez, "coronada" nun festival de teatru cordobés

L'actriz avilesina Sonia Vázquez foi "coronada" pol so trabayu en "Isabel, segunda" col premiu del xuráu nel IV Festival de teatru "Itinerantes" de Cabra (Córdoba ). 

La obra, escrita y empobinada pol xixonés Jorge Moreno, ufierta un repasu en clave de comedia a la historia contemporanea d'España dende la perspectiva d'una reina Isabel II incorporada al momentu presente. El montaxe ye de la compañía "Las muchachas en flor" y tuvo una gran acoyida na escena independiente madrilana, llegando a superar el centenar de funciones. 

Vázquez amosaba esti día a LA NUEVA ESPAÑA el so contentu por "una reconocencia al trabayu, siempre fai falta pa date fuerces pa siguir alantre. Nel nuesu oficiu los ‘non’ son bien habituales. Ye lo que llevo, que daqué preparao con muncho ciñu trescaló y la historia y llegó al públicu. L'oxetivu de cuntala de la forma que queríamos llogróse". 

L'acoyida al so personaxe foi "espectacular, apolmonante dende'l so estrenu en Madrid, en Cabra llegábenme espectadores emocionaes, un señor comentábame que ‘ye la Isabel II que yo m'imaxinaba’... Ye lo meyor que se nos puede dicir, que vivieron la historia con nós".

Aprendió l'actriz "permuncho" d'Isabel II , "una muyer que sufrió y disfrutó a partes iguales, d'ehí la traxicomedia. Consiguió que me quiera más, que me ría más si ye posible de mi mesma, y aceptame. Dexóme llegar a esi estáu casi de médium en que te permites facer y ye la mesma Isabel la que toma la palabra col mio cuerpu y la mio voz. Espero siguir disfrutando muncho col personaxe. Y el públicu conmigo". 

Jorge Moreno, qu'escribió y dirixió la obra, conoz a l'actriz dende va munchos años "y nun dexa de sorprendeme lo dúctil que ye como intérprete: fai fácil lo difícil con una arrogancia y humildá ablucantes. Llogra sumir detrás de caún de los sos personaxes, ameyorando ensin discutiniu, los mios testos. ‘Isabel, segunda’ ye otra pica en Flandes pa esta actriz de raza".