La cayida demográfica: estos son los conceyos que van tener menos conceyales nes próximes elecciones

L'Institutu Nacional d'Estadística acaba de publicar les cifres oficiales del padrón d'habitantes con fecha de 1 de xineru de 2022. Trátase d'un rexistru refechu y alministrativu, conceyu a conceyu, y que tien validez xurídica, por casu a la de determinar el censu electoral, evaluar la edá de los residentes (valorar quién pue ser escoyíu pa formar parte de les meses, ente otres cuestiones) o el so nivel d'estudios.

La llei electoral establez que'l númberu de conceyales de cada Conceyu depende de la población del conceyu y van ser estes cifres adelantaes esti día pol INE les que van determinar el númberu de conceyales que van componer los futuros plenos municipales, una vegada que se celebren les elecciones municipales del 28 de mayu .

El repartu de conceyales sigue la distribución que vien darréu:

• Hasta 100 residentes: 3
• De 101 a 250: 5
• De 251 a 1.000: 7
• De 1.001 a 2.000: 9
• De 2.001 a 5.000: 11
• De 5.001 a 10.000: 13
• De 10.001 a 20.000: 17
• De 20.001 A 50.000: 21
• De 50.001 a 100.000: 25
• De 100.001 p'alantre: Un conceyal más por cada 100.000 residentes o fracción, axuntándose ún más cuando'l resultáu sía un númberu par.

Con éses, según l'actualización del padrón municipal seríen trés los conceyos asturianos que van perder númberu de representantes nel plenariu. Concretamente Cabrales, Cuideiru y Salas. Habría que comparar los datos actuales colos qu'establecía'l censu de 2018, que foi'l que sirvió pa ellaborar el censu electoral en 2019.

Nel casu de Cabrales, el conceyu cabraliegu va pasar de tener once conceyales a nueve, polo que va perder dos, al pasar la población del so padrón de 2002 vecinos a 1907.

Tamién pierden concejal Cuideiru y Salas. Dambos baxen del tramu de población perriba de los 5.000 vecinos. Cuideiru pasa de 5.078 habitantes a 4.280 vecinos; Salas amenorga la población que tenía en 2018 de 5.084 censaos a namás 4.828 vecinos. Nestos dos casos, los plenarios van pasar de tener 13 conceyales a cuntar con once .