Les empreses tecnolóxiques pierden contratos por falta de profesionales

Empreses del sector TIC asitiaes n'Asturies pierden contratos por nun tener personal abondo pa desenvolvelos. La necesidá de profesionales ye tan elevada que se calcula que fadríen falta un millar de persones p'atender les necesidaes de les empreses. Por eso, el Cluster TIC, al que pertenecen 110 empreses del Principáu, pretende crear una bolsa d'empléu a la que puedan recurrir. Nella van entrar la docena d'avilesinos qu'esti día remataron el cursu de formación a la carta y con compromisu de contratación impartíu nel Centru de Empléu "Europa", frutu del alcuerdu suscritu ente'l cluster y el Conceyu d'Avilés. Una formación gratuita que se va repitir con otros dos o trés cursos más a lo llargo d'esti añu, en función de les necesidaes que planteen les compañíes. 

El potente sector del metal asturianu nun ye l'únicu que busca desesperadamente profesionales pa poder optar a contratos que terminen perdiendo. El mesmu problema súfrenlu nel sector tecnolóxicu, que yá lo llevaba anunciando cuando menos dende va dos años. Ye un problema yá xeneralizáu y con graves consecuencies. 

"Esisten oportunidaes de negociu que les empreses tienen que refugar porque nun atopen los profesionales que precisen. Esto pasa toles selmanes. Nu puede roblase'l contratu cuando nun tienes la oportunidá de tener los profesionales que te faen falta. Lo ideal sería tenía una bolsa d'empléu onde tean disponibles los currículos de persones a coles que poder contactar pa contratales", esplicó'l director xeneral del Cluster TIC d'Asturies, Enrique Jáimez, na clausura del cursu de "Testing". 

La ventaya de los cursos a la carta con compromisu de contratación qu'impulsa el Conceyu avilesín ye que dende'l sector empresarial defínese'l so conteníu, por que la formación s'afaye a les necesidaes concretes de les empreses. "Tamién participamos na selección de les persones, por que tengan el perfil que pensamos que ye óptimu. Nesti casu, de 72 candidatos fixéronlu 12. Agora llanzamos el so currículum por que puedan ser escoyíos y contrataos", señaló Jáimez. 

"Nun fai falta ser inxenieru informáticu, porque hai empléu pa persones con una formación básica, como accesibilidá, ciberseguridá, analís de datos... Una persona con un grau como matemátiques o en bioloxía ye mui interesante pola capacidá d'analís de datos que tienen. Pero non solo la formación reglada, sinón la especializada en determinaos ámbitos ye importante", animó'l presidente de l'asociación Clúster, Patricio Arias. 

Y foi más allá, al señalar les dificultaes p'atopar a persones a les que formar. "Hai que desmitificar y perder el mieu que se tien a les tecnoloxíes. L'esfuerzu hai que facelu, pero lo importante ye tener l'actitú y les ganes, y formase de siguío, tar actualizaos, porque la tecnoloxía ye tresversal y da serviciu en tolos procesos productivos. Cuanta más formación se tenga, más oportunidaes y más fácil va ser la contratación", señaló Arias. 

Agora, pa 2023, va diseñase una llinia de formación en función de cómo'l mercáu acepte a estos nuevos profesionales y que va sirvir tamién pa dar continuidá al CIFP d'Avilés. 

"Dende'l sector tecnolóxicu veníemos anunciando dende fai dos o trés años la falta de profesionales, y yá ye un problema xeneralizáu. Ye una paradoxa que, con miles de paraos na rexón, les empreses tengamos tantes necesidaes. Por eso ye tan d'agradecer qu'estes persones dean el pasu de formase, qu'entiendan que son necesaries, que nun hai edaes, que nun hai xéneros, solo actitú y esfuerzu pa consiguir la empleabilidá", señaló Jáimez. 

Y una alvertencia: Avilés ye polu de la innovación, y la falta de personal cualificáu puede atayar l'esfuerzu d'años. 

Otru de los retos del Clúster Tic, señaló'l so presidente, ye esparder l'exemplu formativu d'Avilés a otros conceyos; tamién a la redolada rural.