Drones, los nuevos güeyos de la UME

Los drones tán demostrando la so importancia y lo bien que s'afayen na guerra d'Ucrania, onde pueden facer un gran dañu na retaguardia enemiga. Pero tamién una gran utilidá en tiempos de paz, por casu nel ámbitu de les emerxencies. Con un dron puede esaminase l'interior d'una estructura colapsada, o el perímetru y vector d'avance d'una gran quema. La Unidá Militar d'Emerxencies (UME), que los utilizó na última erupción del volcán de La Palma pa esaminar l'avance de la llingua de llava, creó la Unidá de Drones (UDRUME), que la so instalación definitiva va allugase na base "Conde de Gazola", en San Andrés del Rabanedo (Lleón), onde tamién s'alluga'l V Batallón d'Emerxencies, con circunscripción n'Asturies. Los drones van sofitar a esti batallón cuando tenga qu'actuar en grandes quemes o inundaciones. 

La ministra de Defensa, Margarita Robles, allegó la selmana pasada a Lleón pa participar na presentación de la unidá, que va depender del Batallón de Tresmisiones de la UME (BTUME). Les capacidaes operatives y formatives d'esta unidá van tar centraes nel manexu de drones n'escenarios aéreos, terrestres y acuáticos. Los ámbitos d'actuación van ser de Mandu y Control, Intelixencia, Intervención, NRBQ (Nuclear, Radiolóxica, Bacteriolóxica y Química) y Loxística. Amás, van cuntar con capacidaes tecnolóxiques especiales como'l mapéu 3D, toma d'amueses NRBQ o la toma d'imaxes hiperespectrales, que dexen captar detalles invisibles al güeyu humanu.

L'allugamientu en Lleón ye por mor de ser un llugar estratéxicu pola so cercanía a otres instituciones coles que xenerar sinerxes, como'l Mandu d'Artillería de Campaña, el Grupu d'Obtención por Sistemes Aéreos, el Llaboratoriu d'Ensayos de Cuadros, del Institutu Nacional de Técnica Aeroespacial (INTA) y l'Aeródromu Militar de Lleón, ensin escaecer que va suponer un polu d'atracción que va repercutir mui positivamente, d'un llau, nes relaciones académiques cola Universidá de Lleón y tamién na collaboración y refuerzu del texíu industrial, tecnolóxicu y empresarial de Lleón y la so redolada.

Operativa en 2025

La idea ye que la unidá tea operativa dafechu en 2025. Los primeros pasos van dase n'ochobre, de forma que a final d'añu haya yá un núcleu inicial, y va empezar a incorporar personal a lo llargo de 2024. La unidá va cuntar mesmo con pelotones d'intervención aéreos, terrestres y acuáticos como con secciones d'adiestramientu y simulación. Cuéntase con que la unidá tenga más de cincuenta drones: 30 aéreos, 15 terrestres y 10 acuáticos, la gran novedá. 

Ente 2023 y 2026, el Ministeriu de Defensa va destinar 40 millones a la unidá. Ocho millones van dir a la compra de drones, otros 14 pa los equipos de sofitu y 18 pa infraestructures, cuidao que ta previsto que la base de Lleón s'amplíe a una decena d'instalaciones.

El xefe d'Estáu Mayor de la UME, el coronel Pedro Aneiros, indicó que colos drones la unidá va llograr "más información real de lo que ta pasando y va poder intervenir de forma más eficiente. Con esta unidá y estos medios vamos tar a la vanguardia en lo que tien que ver colo biolóxico y químico, y nun hai una unidá específica nel mundu colos trés tipos de drones, más la parte académica".