Les viviendes más barates d'Asturies tán en Samartín: el metru cuadráu cuesta 556 euros

Les viviendes más barates d'Asturies tán en Samartín del Rei Aurelio. Nesti conceyu de la cuenca del Nalón el metru cuadráu tien un costu, permediu, de 556 euros. Los pisos de les barriaes mineres -munchos d'ellos ensin ascensor y con cocines de carbón- son los que s'ufierten a un costu más amañosu, que puede rondar los 10.000 euros si la vivienda nun ta remocicada y s'alcuentra en pisos altos, al tener accesu namás peles escaleres, según indiquen les inmobiliaries. Families de fuera d'Asturies que busquen una residencia na rexón (yá seya vacacional o como residencia fixa de trabayadores que se xubilen) y persones emigrantes que vienen trabayar suelen ser los principales demandantes d'estes viviendes.

El datu del costu mediu del metru cuadráu (esos 556) procede del informe de precios del portal Idealista correspondiente al mes d'avientu de 2022. Sicasí, n'estudios precedentes, esta mesma web yá asitiara a San Martín como'l conceyu d'Asturies cola vivienda más barato. "La causa principal qu'esplica la tendencia ye'l despoblamientu. Munchos de los pisos de les barriaes pertenecen a persones mayores y cuando ellos van faltando los sos fíos pónenlos en venta. Faenlo a precios afayaízos pa da-yos salida porque son viviendes, en munchos casos, ensin ascensor, con ventanes de madera, con aseos pequeños con bañera o qu'inclusive caltienen la cocina de carbón", espón Germán Escotet, axente de la inmobiliaria Alonso Díaz. 

Al nun disponer d'ascensor, eses viviendes de les barriaes pueden vendese ente los 22.000 y los 24.000 euros si tán nel baxu o nel primer pisu. El preciu baxa escaleres p'arriba, más inda si se da'l casu de que tean ensin iguar. Nesti casu suelen andar polos 10.000 euros. "La última venta que fiximos nós con una vivienda d'esti tipu foi por 12.500 euros", esplica Escotet.

Ente los demandantes figuren principalmente "persones de fuera d'Asturies que quieren tener una residencia vacacional equí a un preciu amañosu, persones emigrantes que vienen trabayar y dalgún rapaz mozu que s'independiza y nun quier gastar munches perres. Tamién hai casos de ventes como inversión de cases que se remociquen pa ponese n'arriendu, porque la ufierta de rentes ta a unos precios muncho más afayaízos que n'otros sitios como Xixón, onde por una casa de dos habitaciones nun barriu periféricu pueden cobrate 450 o 500 euros. Equí sal por 300", diz esti axente inmobiliariu.

Nuna llinia asemeyao pronúnciase Juan Carlos Elías Casal, propietariu de la inmobiliaria Casal. "Ye la llei de la ufierta y la demanda y pónense pisos a precios amañosos porque la demanda ye baxa, al ser cases ensin ascensor o con una eficiencia enerxética baxa. L'accesibilidá y la eficiencia enerxética llévense muncho anguaño pero ye mui difícil, nuna barrida, gastar 14.000 euros nun aislamientu térmicu cuando la casa se vende por 23.000 o 25.000. Y les comunidaes tampoco cuenten poner ascensor porque yá queden mui pocos vecinos".

Sobre los compradores, Elías apunta que, amás de la compra d'estos pisos por parte de persones de fuera d'Asturies que busquen una segunda residencia na rexón, tamién "hai una demanda creciente de xente de Madrid, Valencia o Valladolid que se xubila y vien a vivir equí. Son persones que tuvieron tola so vida viviendo d'arriendu y qu'agora nun quieren metese n'hipoteques, y atopen residencies en propiedá a precios amañosos. Busquen pisos con ascensor y baxos, eso sí, porque tamién son xente mayor". Esta realidá ye extrapolable a otres zones de les Cuenques. "L'estudiu d'Idealista fala de Samartín, pero por exemplu nós detectamos que la vivienda ta más barata n'Ayer".

Llangréu, los pisos más rentables

Nun ye l'únicu informe conocíu apocayá. Según un estudiu d'otru portal inmobiliariu, nesti casu Fotocasa, la ciudá de Llangréu tien una rentabilidá de la vivienda (el cociente ente los ingresos del arriendu y l'importe de la compra d'una casa) perriba del 8%, en concretu, d'un 8,5% de rentabilidá, "convirtiéndose na ciudá más rentable d'Asturies en 2022. Síguenla les ciudaes d'Avilés col 6,0%, Uviéu col 5,9% y Xixón col 5,9%".